فوڈ اتھارٹی کی عدم دلچسپی، جہلم میں لاغرکم عمر بیمار اور مادہ جانوروں کے گوشت کی سرعام فروخت
جہلم: محکمہ لائیو سٹاک، پنجاب فوڈ اتھارٹی کی عدم دلچسپی، لاغرکم عمر بیمار اور مادہ جانوروں کے گوشت کی سرعام فروخت جاری، خطرناک جراثیم شدہ گوشت کے استعمال کے باعث کینسر و دیگر موذی امراض پھوٹنے کا اندیشہ ہے۔
تفصیلات کے مطابق محکمہ لائیو سٹاک سمیت پنجاب فوڈ اتھارٹی کی عدم دلچسپی کے باعث شہر و مضافاتی علاقوں میں بیمار لاغر اور مادہ جانوروں کے گوشت کی فروخت کا سلسلہ جاری ہے۔
متعلقہ اداروں کے افسران نے قصابوں کی دکانوں کی چیکنگ کرنے اور ناقص و غیر معیاری مضر صحت گوشت فروخت کرنے والے قصابوں کو جرمانے کرنے یا مقدمات درج کروانے کی بجائے ٹھنڈے کمروں میں بیٹھ کر سب اچھا ہے کی رپورٹس بھجوانا شروع کر رکھی ہیں۔
دوسری جانب متعلقہ اداروں کی عدم دلچسپی کے باعث قصابوںنے جی بھر کے شہریوں کو دونوں ہاتھوں سے لوٹنا معمول بنا لیا ہے، قصابوں نے نرخ نامے آویزاں کرنے کی بجائے نظروں سے اوجھل کر نرخ نامے لٹکا رکھے ہیں اگر کوئی صارف نرخ نامے کی بابت دریافت کرے تو اشارے کے ذریعے لٹکائے گئے نرخ ناموں کی طرف توجہ مبذول کروا دی جاتی ہے۔
شہریوں نے وزیراعلیٰ پنجاب، چیف سیکرٹری پنجاب، سیکرٹری لائیوسٹاک، ڈی جی فوڈ اتھارٹی سے مطالبہ کیا ہے کہ ضلع جہلم میں نافذ جنگل کے قانون کے خاتمے کے لئے متعلقہ محکموں کے ذمہ داران کو روزانہ کی بنیاد پر چیکنگ کرنے اور پرائس کنٹرول مجسٹریٹس کو سرکاری نرخ ناموں پر عملدرآمد کروانے کا پابند بنایا جائے تاکہ شہری حفظان صحت کے اصولوں کے عین مطابق مقررہ نرخوں پر گوشت خرید کر استعمال کر سکیں۔