سخت پابندی کے باوجود ضلع جہلم میں ایل پی جی کی غیر قانونی ری فلنگ کا دھندہ جاری

جہلم: حکومت پنجاب کی جانب سے سخت پابندی کے باوجود ضلع بھر میں ایل پی جی کی غیر قانونی ری فلنگ کا دھندہ جاری، گنجان آباد علاقوں سمیت مضافاتی علاقوں میں ایل پی جی کی ری فلنگ کے دھندے سے مکین سراپا احتجاج، بڑے نقصانات کااندیشہ ہے۔

تفصیلات کے مطابق جہلم کی چاروں تحصیلوں کے شہری اور مضافاتی علاقوں سمیت دیہی سطح پر حکومتی پابندی کے باوجود ایل پی جی کی غیر قانونی ری فلنگ کا دھندہ بند نہ ہو سکا۔ ایل پی جی کی غیر قانونی ری فلنگ کی وجہ سے شہر ی عدم تحفظ کا شکار ہو چکے ہیں۔

ایل پی جی کی ری فلنگ کے دوران گزشتہ ماہ بھی خطرناک حادثہ رونما ہوا جس کے نتیجے میں 7 افراد جان بحق 10 افراد زخمی ہوئے۔

گنجان آبادیوں اور مضافاتی علاقوں کے اندر اتنا بڑا حادثہ ہونے کے باوجود سول ڈیفنس کے ذمہ داران و عملے کی سرپرستی میں مکرو ہ دھندہ دیدہ دلیری کے ساتھ جاری وساری ہے جس کی وجہ سے مکین عدم تحفظ کا شکار ہو رہے ہیں۔

جہلم شہر اور دیہاتی علاقوں میں آج بھی ایل پی جی کی ری فلنگ کا کاروبار پورے عروج پر ہے۔ ایل پی جی کی ری فلنگ میں غیر معیاری سلنڈر بھی فروخت کئے جا رہے ہیں، جن کی ری فلنگ کے دوران حادثات رونما ہوتے ہیں۔ سول ڈیفنس کے ذمہ داران نے ایل پی جی ری فلنگ کرنے والوں کے ساتھ اور پٹرول فروخت کرنے والوں کے ساتھ معاملات طے کر رکھے ہیں۔

اس طرح ری فلنگ کرنے والے افراد نے واٹس ایپ گروپ تشکیل دے رکھے ہیں ،کسی بھی قسم کی کارروائی سے قبل وٹس ایپ گروپ میں سول ڈیفنس کی جانب سے پیشگی اطلاع کر دی جاتی ہے ،اس طرح ایل پی جی فروخت کرنے والے افراد جہاں گیس ری فلنگ کی جاتی ہے کو تالہ لگا کر بند کر دیتے ہیں اور سول ڈیفنس کا عملہ افسران کو مطمئن کر کے واپس بھجوا دیتے ہیں۔

شہریوں نے کمشنر راولپنڈی اور آر پی او راولپنڈی سے مطالبہ کیا ہے کہ خفیہ اداروں کے ذریعے سروے کروا کر گیس ری فلنگ اور پٹرول فروخت کرنے والے دکانداروں اور ان کی سرپرستی کرنے والے سرکاری افسران و ملازمین کے خلاف محکمانہ کارروائیاںعمل میں لائی جائیں تاکہ شہریوں کے سروں پر منڈلانے والے خوف کے سائے ختم ہو سکیں۔