بدترین مہنگائی نے جہلم کے شہریوں کا جینا مشکل بنا دیا

جہلم: بدترین مہنگائی نے شہریوں کا جینا مشکل بنا دیا ہے۔ آلو، پیاز، بھنڈی، توری، شلجم اور بیگن مقامی سبزیاں دو سو روپے کلو سے زائد قیمتوں میں فروحت ہونے لگیں، آلو ٹماٹر گوبھی بھی عوام کی پہنچ سے دور ہوگئیں۔

تفصیلات کے مطابق جہلم شہر میں دکانداروں نے من مرضی کے ریٹ مقرر کر کے بدترین مصنوعی مہنگائی کا طوفان برپا کررکھا ہے، سبزیوں کے نرخوں میں ہوشربا اضافے سے غریب آدمی کی چیخیں نکل رہی ہیں تاہم بند گو بھی بیگن جیسی سبزیاں دو سو روپے کلو سے زائد قیمتوں میں فروخت ہو رہی ہیں۔

پرائس کنٹرول مجسٹریٹس کہیں نظر نہیں آتے گراں فروشوں کو انتظامیہ کی طرف سے لوٹ مار کی کھلی چھوٹ دے دی گئی ہے جس کی وجہ سے گراں فروشوں نے شہر سمیت ضلع بھر میں لوٹ مار کا بازار گرم کر رکھا ہے۔

صارفین نے نگران وزیر اعلی پنجاب،چیف سیکرٹری پنجاب اور کمشنر راولپنڈی سے مصنوعی مہنگائی کرنے والوں اور ان کی سرپرستی کر نے والے سرکاری افسران کے خلاف کارروائیاں کرنے کا مطالبہ کیا ہے۔