حکومت نے اشٹام ڈیوٹی میں 2 سے 10 گنا اضافہ کر دیا

جہلم: حکومت نے اشٹام ڈیوٹی میں 2 سے 10 گنا اضافہ کردیا۔ بیان حلفی، معاہدوں، طلاق، پاور آف اٹارنی، کرایہ داری سمیت دیگر کیلئے اشٹام ڈیوٹی بڑھا دی، اشٹام ڈیوٹی کی مد میں سالانہ 4 ارب 21 کروڑ روپے عوام کی جیبوں سے مزید نکلوائے جائیں گے۔

تفصیلات کے مطابق نگراں پنجاب حکومت نے اشٹام ڈیوٹی میں 2 سے 10 گنا اضافہ کردیا، دستاویزات کے مطابق اضافہ بڑھتی ہوئی مہنگائی کے پیش نظر کیا گیا۔ بیان حلفی، معاہدوں، طلاق، پاور آف اٹارنی، کرایہ داری سمیت دیگر معاہدوں کے لیے اشٹام پر ڈیوٹی بڑھا دی گئی۔

بیان حلفی کا ریٹ 100 روپے سے بڑھا کر 300 روپے کردیا گیا ہے، غیر منقولہ جائیداد کی فروخت کیلئے اشٹام ڈیوٹی 1200 سے بڑھا کر 3 ہزار روپے، پانچ لاکھ تک کے معاہدے کی اشٹامپ ڈیوٹی 1200 سے 3 ہزار کر دی گئی ، طلاق کیلئے اشٹام فیس 100 روپے سے دس گنا بڑھا کر ایک ہزار روپے کردی گئی ہے۔

اشٹام ڈیوٹی کی مد میں سالانہ 4 ارب 21 کروڑ روپے عوام کی جیبوں سے مزید نکلوائے جائیں گے۔