ایم اینڈ پی کورئیر سروس کی ناقص پالیسیوں کی وجہ سے شہریوں کا اعتماد اٹھنے لگا
جہلم: ایم اینڈ پی کورئیر سروس کے ذمہ داران و عملے کی صارفین کے ساتھ بدتمیزی بد اخلاقی کے چرچے زبان زد عام، کورئیر سروس کی ناقص پالیسیوں کی وجہ سے شہریوں کا اعتماد اٹھنے لگا، شہریوں نے ٹی سی ایس، لیپرڈ دیگر کورئیر سروس اور پاکستان پوسٹ سے رجوع کرنا شروع کر دیا۔
ایم اینڈ پی کورئیر سروس جہلم کے ذمہ داران نے شہریوں کے قیمتی کاغذات، قیمتی اشیاء، امانتیں گھروں میں پہنچانے کی بجائے صارفین کے موبائل فونز پررابطے کر کے اشیاء جی ٹی روڈ پر واقع دفتر سے وصول کرنے کے احکامات دینے شروع کردیئے۔
صارفین کا اس حوالے سے کہنا ہے کہ کورئیر سروس والے اشیاء گھروں میں پہنچانے کا معاوضہ پارسل وصولی کیساتھ ہی وصول کر لیتے ہیں لیکن جہلم ایم اینڈ پی کے ذمہ داران وعملہ امانتیں گھر پہنچانے کی بجائے شہریوں کواپنے دفتر طلب کرتے ہیں اور وہاں پر موجود عملہ انتہائی بداخلاق اور بدتمیز ہے جو صارفین کے ساتھ لڑائی جھگڑا اور بدتمیزی کرنے سے بھی گریز نہیں کرتا۔
ایم اینڈ پی کورئیر سروس ایک پرائیویٹ ادارہ ہے، ناقص پالیسیوں اور بداخلاق عملے کی وجہ سے شہریوں نے دیگر کورئیر سروس اور پاکستان پوسٹ سے رجوع کرنا شروع کردیا ہے۔
شہریوں نے ایم اینڈ پی کے ارباب اختیار سے نوٹس لینے اور جہلم دفتر میں فرض شناس ایماندار بااخلاق ذمہ دار افسران وعملہ تعینات کرنے کامطالبہ کیا ہے۔