پنڈدادنخان میں دوران ڈکیتی مزاحمت کرنے پر فا ئرنگ کر کے قتل کرنے والا ڈکیت گینگ گرفتار

جہلم/پنڈدادنخان: ڈسٹرکٹ پولیس آفیسر ناصر محمود باجوہ کی پریس کانفرنس، خطرناک ڈکیت گینگ تھانہ للِہ پولیس نے حراست میںلے لیا۔

ڈی پی او جہلم نے بتایا کہ ایس ایچ او تھانہ للِہ عبدالرحمٰن اور ٹیم نے شب وروز کی محنت کے بعد تحصیل پنڈدادنخان خوف اور دہشت کی علامت سمجھے جانے والے ڈکیت گینگ کو ڈرامائی انداز میں گرفتار کر لیا۔ رابری معہ قتل کے مقدمہ میں ملوث 5 ملزمان گرفتار کر کے ملزمان سے واردات میں استعمال ہونے والا اسلحہ اور مسروقہ رقم برآمد کر لیا گیا۔

16جولائی کو علی الصبح 3بجکر 20منٹ پر کوٹلی ستیاں کے رہائشی مزدہ ڈرائیور جوکہ مرغیاں لوڈ کر کے خوشاب سے راولپنڈی جا رہے تھے ،جیھٹل کے مقام پر نامعلوم افراد نے سڑک پر پتھر رکھ کر سڑک بند کر رکھی تھی جب گاڑی رکی تو اچانک چار نوجوان لڑکے سامنے آ گے جنہوں نے اسلحہ پکڑ رکھا تھا، اس طرح انہوں نے رقم مبلغ 20ہزار اور موبائل فون چھین لئے۔

واردات میں دوران مزاحمت شہری فیضان ستی فائرنگ سے زخمی ہو گیا جو بعد ازاں زخموں کی تاب نہ لاتے ہوئے جاں بحق ہو گیا۔ ڈکیتی کی اطلاع ملتے ہی ڈی پی او ناصر محمود باجوہ نے جائے وقوعہ کا وزٹ کیا اور ڈی ایس پی آرگنائزڈ کرائم اور ایس ایچ او للِہ کو ملوث ملزمان کی گرفتاری کا حکم دیا۔

پولیس ٹیموں نے ایک ماہ کے قلیل عرصہ میں جدید ٹیکنالوجی اور ہیومین ریسورس کی مدد سے نامعلوم ملزمان کو ٹریس کر کے گرفتار کیا،ملزمان کی درست طور پر شناخت پریڈ بھی کروائی گئی ہے۔ گرفتار ہونے والے ملزمان کی شناخت محمد علی، محمد حسنین، محمد عثمان، ثناء اللہ اور محمد انعام کے ناموں سے ہوئی۔

پولیس نے واردات میں استعمال ہونے والا اسلحہ 4 عدد پسٹل 30 بور اور چھینی گئی رقم 35000 روپے بھی برآمد کر لئے گئے۔ ملزمان نے ڈکیتی اور چوری کی متعدد وارداتوں کے انکشافات کیے ہیں جن سے کل برآمدگی 181000 روپے اور 2 موبائل فونز برآمد کر لئے گئے ہیں جبکہ مزید برآمدگی کا تحرک جاری ہے۔

اس موقع پر ڈی پی او جہلم نے کہا کہ ملزمان چاہے کتنے ہی شاطر کیوں نہ ہوں قانون کی گرفت سے نہیں بچ سکتے۔ انہوں نے بہترین کارکردگی دکھانے پر للِہ پولیس، آئی ٹی سیکشن اور سی آئی اے ٹیموں کو شاباش، تعریفی سرٹیفکیٹ اور نقد انعام دینے کا اعلان کیا۔