جہلم میں تاجر باپ بیٹا قتل، 2 افراد زخمی، لواحقین کا احتجاج، 3 افراد کیخلاف مقدمہ درج
جہلم: غلہ منڈی میں کریانہ شاپ پر فائرنگ سے تاجر باپ بیٹا قتل، دو شدید زخمی،نعشیں سول اسپتال منتقل، دو زخمیوں کو تشویشناک حالت میں راولپنڈی ریفر کر دیا گیا۔ فیصل پہلوان نامی شخص نے پرانی رنجش پر اندھا دھند فائرنگ کر کے دو تاجروں کو دکان پر قتل کیا بعد میں ان کے گھر فائرنگ کر کے دو افراد کو شدید زخمی کر دیا، ملزم کو تھانہ سوہاوہ پولیس نے گرفتار کر لیا۔ قتل ہونے والے دونوں باپ بیٹے کی نماز جنازہ ادا کر دی گئی، لواحقین نے میتیں جنازہ گاہ لے کر جاتے ہوئے تھانہ صدر و سٹی کے باہر احتجاج کیا۔
تفصیلات کے مطابق غلہ منڈی میں مقامی تاجر ملک یامین جس نے غلہ منڈی جہلم کے اندر کریانہ سٹور اور ساتھ کاسمیٹکس سٹور بنا رکھا ہے جہاں پر محمد یامین، ناصر محمود اور فیصل محمود پسران محمد یامین کام کرتے ہیں گزشتہ رات تقریباً سوا نو بجے محمد یامین اپنے بچوں کے ہمراہ موٹر سائیکل پر سوار ہو کر گھر سلیمان پارس کیلئے نکلے تو سامنے سے آنے والے نوجوان فیصل پہلوان ولد عابد حسین سکنہ شمالی محلہ نے پسٹل سے فائر کئے اور للکارا کے آج تم سب باپ بیٹوں کو زندہ نہیں چھوڑوں گا اور سیدھے فائرکرنے شروع کر دئیے۔
فیصل عرف پہلوان نامی شخص کی اندھا دھند فائرنگ سے دو تاجر محمد یامین اور ناصر موقع پر جاں بحق ہو گئے، ملزم قتل کرنے کے بعد سلیمان پارس مقتولین کے گھر گیا جہاں پر فائرنگ کر کے تاجر کے بیٹے اور رشتہ دار کو زخمی کر دیا۔ زخمی ہونے والوں میں فیصل ولد محمد یامین اور احسان ولد صادق شامل ہیں، ریسکیو 1122 نے لاشوں اور زخمیوں کو ڈی ایچ کیو ہسپتال منتقل کر دیا۔
پولیس نے زیر دفعہ 302ت پ324ت پ 109ت پ کے تحت مقدمہ درج کر لیا، واقع کی اطلاع پر ڈسٹرکٹ پولیس آفیسر ناصر محمود باجوہ نے ضلع بھر کی ناکہ بندی کروا دی، سوہاوہ پولیس نے دوران ناکہ بندی گاڑیوں کی تلاشی کے دوران قتل کے ملزم فیصل پہلوان کو حراست میں لے کر جہلم منتقل کر دیا ہے۔
قتل ہونے والے دونوں باپ بیٹے کی نماز جنازہ ادا کر دی گئی، لواحقین نے میتیں جنازہ گاہ لے کر جاتے ہوئے تھانہ صدر و سٹی کے باہر احتجاج کیا۔
مدعی مقدمہ یاسر محمود ولدمحمد یامین نے فیصل پہلوان اس کے والد عابد حسین اور کاشف ولد عابد حسین کے خلاف مقدمہ درج کروا دیا ہے۔