جہلم میں خاوند نے بیوی، بیٹے اور بیوی کی کزن کو قتل کر کے خودکشی کر لی
جہلم کے علاقہ ویسٹ کالونی میں خاوند نے بیوی، بیوی کی کزن اور سوتیلے بیٹے کو فائرنگ کرکے قتل کردیا اور خود کو گولی مار کر خودکشی کرلی۔
پولیس حکام کے مطابق واقعہ جہلم کی ویسٹ کالونی میں گورا قبرستان کے قریب پیش آیا اور فائرنگ کرنے والے شخص کی شناخت شاہد فاروق کے نام سے ہوئی، جو مقتولہ کا خاوند تھا۔ کرائے کے مکان میں رہائش پذیر ملزم نے اپنی بیوی، بیوی کی کزن اور 15 سالہ سوتیلے بیٹے بابر امین کو غیرت کے نام پر قتل کیا اور خود کو گولی مار کر زندگی کا خاتمہ کر لیا۔
اس فیملی کی ایک بچی جو سکول گئی ہوئی تھی واپس آئی تو گھر میں چار لاشیں خون میں لت پت پڑی تھی۔
واقعہ کی اطلاع ملتے ہی ڈی پی او ناصر محمود باجوہ ،ایس ایچ او تھانہ صدر چوہدری عمران گجر ،ایس ایچ او تھانہ کالا گجراں ملک نثار احمد ،انچارج سی آئی اے سٹاف انسپکٹر چوہدری محمد الیاس سمیت پولیس کی بھاری نفری جائے وقوعہ پر پہنچ گئے۔
پولیس نے علاقے کو کارڈن آف کر کے جائے وقوعہ سے شواہد جمع کر لئے۔ قتل ہونے والوں کی شناخت رخسانہ، بابر اور سدرہ کے ناموں سے ہوئی ہے، چاروں لاشوں کو تحویل میں لے لیا گیا اور سول اسپتال جہلم منتقل کر دیا گیا۔