احتجاج کی آڑ میں گھیراؤ جلاؤ کا ارتکاب کرنے والے اپنے انجام کو پہنچیں گے۔ چودھری لال حسین

جہلم: چودھری لال حسین نے کہا ہے کہ نواز لیگ نے ہمیشہ عدالتی فیصلوں کا احترام کیا ہے۔ عمران خان کی گرفتاری کا فیصلہ وفاقی حکومت یا نواز لیگ کا نہیں بلکہ نیب کا اقدام تھا تا ہم عمران خان کی گرفتاری پر ملک کے اندر جو فتنہ فساد ،انتشار قومی املاک کو نقصان گھیراؤ جلاؤ ریاستی اداروں پر حملے ہوئے وہ قابل افسوس اور قابل گرفت ہیں۔

مسلم لیگ (ن) کے سابق ایم پی اے اور پی پی 26 کے امیدوار چودھری لال حسین نے مسلم لیگ (ن) کے ضلعی سیکرٹریٹ سول لائن روڈ پر گفتگو کرتے ہوئے کہا کہ ہمارا عمران خان سے ذاتی نہیں بلکہ نظریاتی اختلاف ہے، انہیں چاہیے کہ وہ سڑکوں پر آنے کی بجائے پارلیمان میں پہنچ کر جمہوری انداز میں اپنے مطالبات پیش کریں جس سے ملک کے اندر اخلاقی و جمہوری روایات کو فروغ دیکر تصادم اور تشدد کی سیاست سے بچا جا سکتا ہے۔

چودھری لال حسین نے کہا کہ نواز لیگ کے قائد اور ان کی بیٹی مریم نواز شریف سمیت متعدد رہنماؤں نے قید و بند کی صعوبتیں برداشت کیں اور بے بنیاد مقدمات کے الزامات میں پیشیاں بھگتیں، مگر انار کی کو ہوا دینے کی کبھی کوشش نہیں کی جو پارٹی قیادت کی جمہوریت پسندی کا واضح ثبوت ہے۔

انہوں نے کہا کہ پی ٹی آئی نے اپنے طرز عمل سے واضح کر دیا ہے کہ یہ سیاسی جماعتوں میں شرپسندوں کا ٹولہ ہے جو ملکی حالات خراب کرنا چاہتے ہیں۔ احتجاج کی آڑ میں گھیراؤ جلاؤ کا ارتکاب کرنے والے اپنے انجام کو ضرور پہنچیں گے اور جلد قانون کی گرفت میں ہوں گے۔