ای او بی آئی کے پنشنرز کی پنشن کم از کم تیس ہزار مقرر کی جائے۔ ای او بی آئی پنشنرز

جہلم: ای او بی آئی کے پنشنرز کی پنشن کم از کم تیس ہزار مقرر کی جائے ، مہنگائی کے اس پُر فتن دور میں 8ہزار5 سو روپے سے پنشنرز کا گزر بسر کیسے ہو سکتاہے، موجودہ حالات میں مہنگائی عروج پر ہے، ماچس کی ڈبیا سے لے کر آٹا ،گھی ،چینی، دالیں سب سے بڑھ کر ادویات غریب آدمی کی پہنچ سے دور ہو چکی ہیں۔

ان خیالات کا اظہار ای او بی آئی کے پنشنرز نے کیا۔ انہوں نے کہا کہ ادویات کا ذکر اس لیے کیا ہے کہ ساٹھ سال کی عمر کے بعد انسان ادویات کے سہارے جیتا ہے، ویسے تو تقریبا ادویات اب ہر عمر کے فرد کی ضرورت بن چکی ہیں۔ بڑھاپے میں غریب کو پنشن کا سہارا ہوتاہے، ساٹھ سال کے بعد 8500 سوروپے پنشن ایک بوڑھے انسان کی اس دور میں ضروریات کیسے پورے کر سکتے ہیں۔

انہوں نے کہا کہ موجودہ حکومت نے پینشن دس ہزار روپے مقرر کی ہے لیکن حکومتی حکم پر ابھی تک عمل درآمد نہیں ہوا جبکہ آٹا، چینی، دالوں ،بجلی، گیس سمیت اشیاء ضروریہ کی قیمتوں میں عمل درآمد کرتے ہوئے نرخوں میں بے پناہ اضافہ کر دیا گیا ہے جس سے سب سے زیادہ متاثر ای او بی آئی کے پنشنرز ہوئے ہے۔

انہوں نے کہا کہ حکومت کسی بھی جماعت کی ہو پنشنر ز کیلیے خاص کر ای او بی آئی کے بزرگ پنشنرز کیلئے کم از کم بیس ہزار مقرر ہونی چاہیے تا کہ اس مہنگائی کے پُر فتن دور میں وہ اپنی سفید پوشی کا بھرم قائم رکھ سکیں،بزرگ پنشنرز 8ہزار5سو میں کسی صورت گزارہ نہیں کر سکتے۔

انہوں نے کہا کہ چیف جسٹس آف پاکستان نوٹس لیکر ای او بی آئی کے پنشنرز کی پنشن کم ازکم 20ہزار مقرر کرنے کے احکامات جاری کریں تاکہ بزرگ پنشنرز اپنی زندگی کے ایام باعزت طریقے سے بسر کر سکیں۔