جہلم شہر اور گردونواح میں مضر صحت اشیاء کی کھلے عام فروخت، فوڈ اتھارٹی خاموش
جہلم: شہر اور گردونواح میں مضر صحت اشیاء کی کھلے عام فروخت جاری ،پنجاب فوڈ اتھارٹی کے ذمہ داران نے شہریوں کے مسائل سے لا تعلقی اختیار کر لی ، مضر صحت ناقص اشیاء فروخت کرنے والے دکانداروں کی موجیں لگ گئیں۔
تفصیلات کے مطابق شہر و گردونواح میں رمضان المبارک کے دوسرے عشرے کے آغاز پر بھی روزہ داروں کے لئے تیار ہونے والے سموسے پکوڑے اور دیگر کھانے پینے کی اشیاء میں ملاوٹ سمیت باسی ،گلی سڑی اور بدبو دار مضر صحت ، سبزیوں اور ناقص وغیر معیاری گھی کا استعمال دھڑلے سے کیا جارہاہے۔
چند پیسوں کی خاطر روزہ داروں اور دیگر شہریوں کی جانوں سے کھیلنے والے دکانداروںکے خلاف کارروائی کرنے میں پنجاب فوڈ اتھارٹی کے ذمہ داران نے مکمل خاموشی اختیار کر رکھی ہے، صارفین کی شکایت کی صورت میں متعلقہ ذمہ داران فوٹو سیشن کرکے سب اچھا ہے کہ رپورٹس بھجوا دیتے ہیں جبکہ حقیقت اس کے برعکس ہے ۔ مضر صحت اور غیر معیاری اشیاء کے استعمال سے روزانہ متعدد شہری متاثر ہو کر ہسپتالوں کا رخ کر رہے ہیں۔
صارفین نے ڈی جی پنجاب فوڈ اتھارٹی ، کمشنر راولپنڈ ی ،ڈپٹی کمشنر سے مضر صحت اشیاء کی فروخت کرنے والے دکانداروں کے خلاف کارروائیاں کرنے کا مطالبہ کیا ہے۔