سوہاوہ میں ڈاکوؤں کی پولیس پر فائرنگ، ایس ایچ او اور ہیڈ کانسٹیبل زخمی، 3 ڈاکو گرفتار
سوہاوہ میں ڈاکوؤں کی پولیس پر فائرنگ، ایس ایچ او اور ہیڈ کانسٹیبل کھائی میں گر کر زخمی، پولیس نے 3 ڈاکوؤں کو گرفتار کر لیا، ایک ڈاکو فرار ہونے میں کامیاب ہو گیا۔
تفصیلات کے مطابق تھانہ سوہاوہ کے علاقہ بکڑالہ میں ڈکیتی کی نیت سے موجود ڈاکوؤں نے پولیس کو دیکھتے ہی پولیس پارٹی پر فائرنگ کر دی، سوہاوہ پولیس نے ڈکیتی کی نیت سے موجود 3 ملزمان اورنگزیب ، شاہ زیب اور ابو سفیان کو مناسب حکمت عملی سے گرفتار کر کے ملزمان سے ناجائز اسلحہ بھی برآمد کر لیا۔
تھانہ سوہاوہ کے علاقہ بکڑالہ میں ملزمان کی پولیس پارٹی پر فائرنگ کا معاملہ،
ایس ایچ او سوہاوہ عثمان تصدق کی کاروائی،واقعہ میں ملوث 03 ملزمان گرفتار،
سوہاوہ پولیس نے ڈکیتی کی نیت سے موجود 03 ملزمان اورنگزیب ، شاہ زیب اور ابو سفیان کو مناسب حکمت عملی سے گرفتار کر لیا، pic.twitter.com/ElV1sqXndX
— JHELUM POLICE (@police_jhelum) August 22, 2023
چوتھا ملزم مبین گرفتاری سے بچنے کےلئے پولیس پارٹی پر فائرنگ کرتے ہوئے رات کی تاریکی کا فائدہ اٹھاتے ہوئے فرار ہو گیا جس کی گرفتاری کےلئے چھاپے مارے جا رہے ہیں، ملزم مبین کی گرفتاری کے لئے پیچھا کرتے ہوئے ایس ایچ او سوہاوہ عثمان تصدق اور ہیڈ کانسٹیبل محمد شفیق کھائی میں گرنے سے زخمی ہوگئے۔
ڈی پی او جہلم ناصر محمود باجوہ نے ایس ایچ او سوہاو ہ عثمان تصدق اور اور ہیڈ کانسٹیبل محمد شفیق کی عیادت کی اور ڈی ایس پی سوہاوہ کو بہترین طبی سہولیات فراہم کرنے کی ہدایت کی۔
اس موقع پر ڈی پی او جہلم ناصر محمود باجوہ نے کہا کہ قانون کی عملداری کو یقینی بنایا جائے گا، قانون کی رٹ کو چیلنج کرنے والوں سے سختی سے نمٹا جائے گا۔
ڈی پی او جہلم نے ایس ایچ او سوہاوہ ، ہیڈ کانسٹیبل محمد شفیق اور پولیس ٹیموں کو بہادری سے ملزمان کا مقابلہ کرنے ا ور گرفتار کرنے پر شاباش، تعریفی سرٹیفکیٹ اور نقد انعام دینے کا اعلان کیا۔