ضلع جہلم کی ہول سیل مارکیٹوں میں گندم کی قیمتوں میں بڑا اضافہ

جہلم: غلہ منڈیوں میں اجناس کی قیمتوں میں اضافے کا سلسلہ جاری ہے۔ ضلع جہلم میں گندم کی قیمت 5 ہزار روپے من کی ریکارڈ سطح پر پہنچ گئی۔ شہری پریشان، آٹا مزید مہنگا ہونے کا خدشہ پیدا ہوگیا۔

جہلم سمیت پنجاب بھر کی اجناس منڈیوں میں گندم کی قیمت میں 100 روپے من کا اضافہ ہوگیا۔ ضلع جہلم سمیت پنجاب بھر میں گندم کی قیمت 5 ہزار روپے من کی ریکارڈ سطح پر پہنچ گئی جبکہ پنجاب حکومت کی جانب سے گندم کی سرکاری قیمت 3900 روپے من مقرر ہے۔

جہلم، دینہ، سوہاوہ اور پنڈدادنخان سمیت دیگر علاقوں میں گندم کی مہنگے داموں فروخت جاری ہے اور ضلعی انتظامیہ گندم کی سرکاری قیمت پر عمل درآمد نہیں کرا رہی۔ ضلعی انتظامیہ نے شہریوں کو گراں فروشوں کے رحم وکرم پر چھوڑ دیا ہے۔