جہلم میں مسلح ڈکیت سرعام شہری کو تشدد کا نشانہ بنا کر موٹرسائیکل، نقدی اور موبائل لوٹ کر فرار
جہلم(چوہدری عابد محمود +عامر کیانی) چوروں، ڈاکوں نے ات مچا دی، متعدد افراد کنگال، پولیس شہریوں کے جان ومال کی حفاظت کرنے میں بُری طرح ناکام، شہری دن دیہاڑے لٹنے لگے، مسلح ڈکیت سرعام شہری کو تشدد کا نشانہ بنا کر موٹرسائیکل، نقدی اور موبائل لوٹ کر فرار ہو گئے، ڈاکوؤں نے شہر سمیت ضلع بھر کو لیاری میں تبدیل کر لیا۔
تفصیلات کے مطابق تھانہ سول لائن کے علاقہ نیا محلہ کے رہائشی ذیشان طارق ولد طارق محمود نے تھانہ سول لائن درخواست دیتے ہوئے موقف اختیار کیا کہ شام 6 بجے دکان بند کر کے دودھ لینے کے لیے دودھ والی دکان پر گیا وہاں سے واپس گھر جا رہا تھا جب مسجد تقوی موڑ پر پہنچا تو 2 نوجوان جنہوں نے شلوار قمیض پہن رکھی تھی جن کی عمریں 35/40سال کے قریب تھیں اچانک سامنے آئے اسلحہ کے زور پر مجھے روک لیا۔
متاثرہ شخص نے بتایا کہ میرا موٹر سائیکل ہنڈا 125 ماڈل اور میری جیب میں موجود 5 ہزار روپے موبائل فون شناختی کارڈ ڈرائیو نگ لائسنس اے ٹی ایم کارڈ چھین کر گرلز ہائی سکول نمبر 2 عید گاہ مسجد کی طرف موٹر سائیکل پر سوار ہو کر بھاگ گئے۔
سرعام واردات کی سی سی ٹی وی فوٹیج سامنے آ گئی۔ فوٹیج میں دو مسلح ملزمان کو واردات کرکے فرار یوتے دیکھا جاسکتا ہے، دونوں ملزمان کپڑوں میں ملبوس ہیں ایک ملزم نے سر پر ٹوپی پہنے دیکھا جاسکتا ہے، فوٹیج میں ملزمان کے چہرے واضح نظر آرہے ہیں۔
دو روز قبل دینہ بائی پاس کے قریب نامعلوم ملزمان نے پٹرول پمپ کے ملازمین سے 53لاکھ روپے چھین لیے اور دیدہ دلیری کے ساتھ فرار ہو گئے شہریوں کا کہنا ہے کہ رواں سال چوری، ڈکیتی ،راہزنی کی وارداتوں میں غیر معمولی اضافہ ہو اہے جوکہ پولیس کی ناقص کارکردگی کا منہ بولتا ثبوت ہے۔
شہریوں نے وزیر اعلی پنجاب ،آئی جی پنجاب ،آر پی او راولپنڈی سے ضلع جہلم میں نافذ جنگل کے قانون کے خاتمے کا مطالبہ کیا ہے۔