ڈی پی او ناصر محمود باجوہ کی زیر صدارت ڈی پی او آفس میں کرائم میٹنگ کا انعقاد
جہلم: ڈی پی او ناصر محمود باجوہ کی زیر صدارت ڈی پی او آفس میں کرائم میٹنگ کا انعقاد کیا گیا۔
ڈی ایس پی لیگل، ڈی ایس پی ہیڈ کوارٹرز، ڈی ایس پی صدر، ڈی ایس پی سوہاوہ، ڈی ایس پی آرگنائزڈ کرائم اور ایس ایچ اوز ضلع ہذا اور انچارج برانچز نے میٹنگ میں شرکت کی، ڈی ایس پی پنڈ دادنخان نے بذریعہ ویڈیو لنک میٹنگ میں شرکت کی۔
ایس ڈی پی اوز اور ایس ایچ اوز نے فردا فردا جرائم کی مجموعی صورتحال اور جرائم پیشہ عناصر کیخلاف جاری آپریشنز کے متعلق تفصیلی بریفنگ دی،ڈی پی او نے ناقص کارکردگی دکھانے والے ایس ایچ اوز کو شوکاز اور ایس ڈی پی اوز کو لیٹر آف ایکسپلینیشن جاری کیے۔
انہوں نے کہا کہ سنگین مقدمات کی تفتیش سپروائزری افسران اپنی نگرانی میں عمل میں لاتے ہوئے جلد یکسو کریں، زیر تفتیش مقدمات میں ملزمان کی گرفتاری اور برآمدگی کو ہر صورت یقینی بنایا جائے، جرائم میں کمی کیلئے پیشہ ور جرائم پیشہ عناصر کے خلاف کریک ڈاؤن میں تیزی لائی جائے۔
ڈی پی او ناصر محمود باجوہ نے کہا کہ انسپکٹر جنرل آف پولیس پنجاب ڈاکٹر عثمان انور کی طرف سے دی گئی ٹائم لائن کو مدنظر رکھتے ہوئے ایف آئی آر کے اندراج کو یقینی بنایا جائے،شہریوں کو فوری انصاف کی فراہمی، میرٹ اور قانون کی بالادستی سمیت بہترین سروس ڈیلیوری کو ہر صورت یقینی بنایا جائے۔