نوازشریف عوام کا مینڈیٹ لے کر بجلی سستی کریں گے، بلال اظہر کیانی

پاکستان مسلم لیگ (ن) کے اسسٹنٹ سیکریٹری جنرل بلال اظہر کیانی نے کہا ہے کہ سابق وزیر اعظم محمد نواز شریف نے 2013 سے 2017 کے دوران ملک سے لوڈشیڈنگ کے اندھیرے ختم کرنے کا وعدہ پورا کیا، بجلی، گیس، آٹا چینی روٹی سستی، مہنگائی 47 سال کی کم ترین سطح پر لائے، وہ عوام کا مینڈیٹ لے کر بجلی سستی کریں گے۔

انہوں نے اپنے ایک ٹویٹ میں کہا کہ نواز شریف کے شروع کردہ ترقی کے اس سفر کو سابق حکمران نے تباہ کر دیا، معیشت کی طرح توانائی کے شعبے کی تباہی کے بھی وہی ذمہ دار ہیں۔ اپنے ساڑھے تین سالہ دور میں انہوں نے انرجی کے شعبے میں ’ری بیسنگ‘ (قیمتوں کے تعین کا بنیادی پیمانہ) نہ کرکے چار سال میں بجلی کے شعبے کا گردشی قرض (1152 ارب سے) دوگنا کر دیا اور اسے 2253 ارب روپے پر پہنچا دیا۔

بلال اظہر کیانی نے کہا کہ یہ نااہلی، مجرمانہ غفلت اور عوام کو اذیت میں مبتلا کرنے کی فرد جرم ہے۔ وزیراعظم شہبازشریف نے 16 ماہ میں گردشی قرض بڑھنے کی رفتار پر قابو پایا، ری بیسنگ اور سلیب بنا کر معاشرے کے کمزور ترین طبقات کو بجلی کی قیمتوں میں اضافے سے بچایا۔ 200 یونٹ تک بجلی استعمال کرنے والے لائف لائن اور پروٹیکٹڈ صارفین کے لئے قیمت میں اضافہ نہیں ہونے دیا، ان ساڑھے63 فیصد گھریلو صارفین کی تعداد ایک کروڑ 10 لاکھ ہے۔

انہوں نے کہا کہ آج بجلی کی قیمت میں ہونے والے اضافے کاذمہ دار بھی وہی ہے جس نے ڈیزل اور فرنس آئل سے مہنگی بجلی بنائی جس کی قیمت آج صارفین کو بھرنا پڑ رہی ہے۔ پھر انشاءاللہ عوام کا مینڈیٹ لے کر نواز شریف بجلی سستی کریں گے، روزگار دیں گے، ملک ترقی کرے گا یہ وعدہ ہے۔