دینہ میں ایک ہی رات تین گھروں میں ڈکیتی، ڈاکو طلائی زیورات، نقدی اور دیگر اشیاء لوٹ کر فرار

دینہ کے نواحی علاقہ نکی میں ایک ہی رات میں 3گھروں میں ڈکیتی کی دلیرانہ واردات ، 4نامعلوم مسلح ڈاکو گھروں میں داخل ہو کر اہل خانہ کو یرغمال بنا کر لاکھوں روپے مالیت کے طلائی زیورات ، لاکھوں کی نقدی ، موبائل فون اور دیگر اشیاء لوٹ کر فرار ، ڈاکو بڑی دلیری کے ساتھ سیڑھی لگا کر گھر میں داخل ہوئے اور بڑے آرام کے ساتھ لوٹ مار کرتے رہے۔

تفصیلات کے مطابق دینہ کے نواحی علاقہ نکی جیکسی میں ایک ہی رات میں 3گھروں میں ڈکیتی کی دلیرانہ واردات ہوئی، 4 نامعلوم مسلح ماسک پہنے ڈاکو سیڑھیوں کے ذریعے گھروں میں داخل ہو کر اہل خانہ کو اسلحہ کی نوک پر یرغمال بنا کر جان سے مار دینے کی دھمکی دیتے ہوئے لوٹ مار شروع کر دی۔

ڈاکو نکی کے رہائشی عمر حنیف ولد محمد حنیف، حفیظ ولد محمد صادق اور چوہدری صابر کے گھروں میں داخل ہوئے اور لاکھوں روپے مالیت کے طلائی زیورات، لاکھوں کی نقدی اور قیمتی موبائل فون سمیت دیگر اشیاء لوٹ لی۔ ڈاکوؤں نے خواتین سے پہنے ہوئے زیورات بھی اتروا لیے اور بڑی آسانی کے ساتھ لوٹ مار کرتے ہوئے فرار ہو گئے۔

واردات کے بعد علاقہ میں شدید خوف وہراس پھیل گیا۔ اطلاع ملتے ہی ڈی ایس پی صدر ایس ایچ او تھانہ دینہ سمیت پولیس کی بھاری نفری پہنچ گئی اور مقدمہ درج کر کے ڈاکوؤں کی تلاش شروع کر دی۔

یاد رہے کہ دینہ میں بڑھتی ہوئی وارداتوں کے باعث شہری عدم تحفظ کا شکار ہونے لگے۔