جہلم میں غیر رجسٹرڈ ٹریولز ایجنٹوں کی بھرمار، نوجوان انسانی سمگلروں کے ہاتھوں لٹنے لگے

جہلم: قانونی اداروں کی غفلت یا چمک کا کمال شہر سمیت ضلع بھر میں غیر رجسٹرڈ ٹریولز ایجنٹوں کی بھرمار، تعلیم کے نام پر انگلینڈ، امریکہ آسٹریلیا سمیت یورپ کے مختلف ممالک بھجوانے کی آڑ میں بیرون ملک جانے کے خواہشمند نوجوان انسانی سمگلروں کے ہاتھوں لٹنے لگے۔

شہر اور ضلع بھر میں قانونی اداروں کی غیر فعال سرگرمیوں کے باعث غیر قانونی ٹریولز ایجنٹ مافیا نے اپنے کارندوں کے ذریعے سادہ لوح پڑھے لکھے نوجوانوں کو بیرون ملک بھجوانے کے لیے سرعام غیر قانونی دھندہ شروع کر رکھا ہے، انسانی سمگلروں نے دلکش اشتہارات کے ذریعے طلبہ و طالبات کو یورپی ممالک میں اعلیٰ تعلیم کی آڑ میں ویزہ دلوانے کے عوض بھاری رقم کی وصولی شروع کر رکھی ہے۔

علاوہ ازیں کوریا، سعودی عرب قطر، عمان، دوبئی سمیت دیگر ممالک کے ورک ویزہ کاجھانسہ دے کر بیرون ملک جانے کے خواہشمند سادہ لوح افراد سے لاکھوں روپے بٹو ر رکھے ہیں، جو ویزے نہ ملنے کی وجہ سے دربدر کی ٹھوکریں کھانے پر مجبور ہیں۔

متاثرین اپنی رقم کی واپسی کا مطالبہ کریں تو بااثر نوسرباز انہیں سنگین نتائج کی دھمکیوں سمیت مقدمات میں الجھانے اور سیاسی دباؤ ڈال کر انہیں خاموش کروا دیتے ہیں۔ ان انسانی سمگلروں نے شہر کے وسط میں واقع پلازوں میں شیشہ نما دفاتر بنا رکھے ہیں، جن کے ایجنٹ شہری حدود سمیت مضافاتی علاقوں میں ان نوسر بازوں کے لئے شکار تلاش کر کے ان کے قدموں میں ڈھیر کر دیتے ہیں۔

بااثر مافیا نے کوریا، انگلینڈ، اٹلی، فرانس، ناروے، سپین، ساؤتھ افریقہ، امریکہ بھجوانے کے لاکھوں روپے جبکہ سعودی عرب، مسقط، عمان دمشق، دوبئی، شارجہ وغیرہ کا کام بھی لاکھوں روپے کے عوض دیدہ دلیری سے کیا جا رہا ہے۔ قابل زکر بات یہ ہے کہ مافیا نے ایف آئی اے سمیت دیگر اداروں کے افسران سے گٹھ جوڑ کر رکھا ہے جس کی وجہ سے کوئی بھی سرکاری افسر یا اہلکار مافیا کو ہاتھ ڈالنے سے گھبراتا ہے۔

شہریوں نے وفاقی وزیر داخلہ، ڈی جی ایف آئی اے، چیئرمین نیب سے مطالبہ کیا ہے کہ شہر سمیت چاروں تحصیلوں میں انسانی سمگلنگ کا غیر قانونی دھندہ کرنے والے بااثر مافیاز کے خلاف آپریشن کر کے ان کے خلاف فوجداری مقدمات درج کئے جائیں تاکہ پڑھے لکھے نوجوان جمع پونجی لٹنے والے نوسربازوں سے محفوظ رہ سکیں۔