ایف آئی اے کی ابوظہبی میں کارروائی، پنڈدادنخان کے سبزی فروش کو قتل کرنے والا ملزم گرفتار
پنڈدادنخان: سبزی فروش کو قتل کر کے بیرون ملک فرار ہونے والا ملزم گرفتار کر لیا گیا۔
پولیس کا بتانا ہے کہ ملزم منیر حسین کو انٹرپول کے ذریعے جہلم پولیس کے حوالے کیا گیا، ملزم نے 2009ء میں معمولی تلخ کلامی پر فائرنگ کر کے ایک شخص کو قتل اور ایک کو زخمی کردیا تھا۔
پولیس کا کہنا ہے کہ ملزم جرم سرزد کرنے کے بعد متحدہ عرب امارات فرار ہوگیا، ایف آئی اے انٹرپول سمیت دیگر اداروں کی کوششوں سے بیرون ملک فرار ملزم کی گرفتاری عمل میں آئی۔
وفاقی تحقیقاتی ادارے (ایف آئی اے) انٹرپول پاکستان نے پنڈدادنخان کے سبزی فروش کو قتل کرنے والے ملزم سمیت سنگین جرائم میں مطلوب 4 ملزمان کو گرفتار کیا۔ اشتہاری ملزمان کو ابوظہبی سے گرفتار کر کے اسلام آباد ائرپورٹ منتقل کر دیا گیا۔ گرفتار ملزمان اسلام آباد اور پنجاب پولیس کو مطلوب تھے جن میں ارباب خلیل، علی رضا، منیر حسین اور محمد خان شامل ہیں۔
ملزم ارباب خلیل اسلام آباد پولیس، علی رضا فیصل آباد جبکہ منیر حسین اور محمد خان جہلم اور ڈیرہ غازی خان پولیس کو مطلوب تھے۔
گرفتار ملزمان کے خلاف قتل کی دفعات کے تحت مقدمات درج تھے۔ ایف آئی اے این سی بی انٹرپول پاکستان نے ملزمان کی گرفتاری کے لیے ریڈ نوٹسسز جاری کیے تھے۔
بعد ازاں ایف آئی اے امیگریشن نے ملزمان کو متعلقہ پولیس حکام کے حوالے کر دیا۔ ملزمان کی حوالگی انٹرپول اسلام آباد کی انٹرپول ابوظہبی کے ساتھ قریبی رابطہ کاری کی وجہ سے ممکن ہوئی۔
ترجمان ایف آئی اے کے مطابق این سی بی انٹرپول پاکستان بیرون ملک فرار ہونے والے ملزمان کی گرفتاری کے لیے گراں قدر خدمات سرانجام دے رہا ہے۔ انتہائی مطلوب ملزمان کی گرفتاری اور بروقت حوالگی کے لیے این سی بی انٹرپول پاکستان ہمہ وقت کوشاں ہے۔