رمضان کا مبارک مہینہ ایک بھٹی ہے جس میں بندہ مومن کندن بن کر نکلتا ہے۔ امیر عبدالقدیر اعوان

سوہاوہ: امیر عبدالقدیر اعوان نے کہا کہ رمضان المبارک کا مبارک مہینہ ایک بھٹی ہے جس میں بندہ مومن کندن بن کر نکلتا ہے، اللہ کریم کے احکامات میں مخلوق کی بھلائی ہے اور تعمیل حکم میں ہی مخلوق کی کامیابی ہے، عبادات ہماری ضرورت ہیں روزہ ایسی عبادت ہے جسے اللہ کریم نے سابقہ اقوام پر بھی نازل فرمایا۔

امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان نے خطاب کرتے ہوئے کہا کہ رمضان المبارک کی آمد آمد ہے رمضان المبارک میں پرہیز گاری اور حضورحق کی کیفیت نصیب ہوتی ہے، دیکھنا یہ ہے کہ کیا ہم رمضان المبارک کے منتظر ہیں، کیا ہمارے اندر شوقِ عبادت ہے، کہیں ہم عبادات کو بوجھ تو نہیں سمجھتے؟۔

انہوں نے کہا کہ صحت و بیماری زندگی کے حصے ہیں اور یہ احساس زندگی دلاتے ہیں، معمولات زندگی میں بے احتیاطی اور کمزوری ایمان کی کشتی میں وہ چھوٹا چھوٹا کنکر ہے جو کشتی کے ڈوبنے کا سبب بن سکتا ہے، ایمان کے ساتھ عبادات آتی ہیں جن کی ادائیگی سے بندہ اپنے معاملات درست رکھتا ہے۔

امیر عبدالقدیر اعوان نے کہا کہ روزہ دار کو خصوصی انعامات سے نوازا جاتا ہے رمضان المبارک میں شیاطین قید کر دئیے جاتے ہیں اس کے باوجود معاشرے میں برائی جاری ہے اس کی وجہ یہ ہے کہ باقی گیارہ مہینے شیطنت اس قدر ہم پر اپنے اثرات چھوڑ چکی ہوتی ہے کہ رمضان المبارک میں شیاطین تو قید ہو جاتے ہیں لیکن وہ شیطنت جو ہم پرباقی گیارہ مہینے مسلط رہی ا س کے اثرات کی وجہ سے ہم رمضان المبارک میں نا فرمانیاں کر رہے ہوتے ہیں۔

انہوں نے کہا کہ کوئی بھی معاملہ ایسا نہیں جو اللہ کریم کے حکم سے باہر ہواللہ کریم ہمیں اپنے معاملات میں احکامات الٰہی کی پابندی کرنے کی توفیق عطاء فرمائیں، اللہ کریم صحیح شعور عطا فرمائیں۔آمین