دینہ میں ڈاکوؤں نے پٹرول پمپ کے 2 ملازمین سے 53 لاکھ روپے لوٹ لئے
دینہ جی ٹی روڈ پر دن دیہاڑے ڈکیتی کی بڑی واردات، 3 نامعلوم مسلح موٹرسائیکل سوار نقاب پوش ڈاکو سابق پی ٹی آئی رہنما چوہدری زاہد اختر کے پٹرول پمپ کے 2 ملاز مین سے 53 لاکھ کی نقدی لوٹ کر فرار ہو گئے۔ واردات کی اطلاع ملتے ہی ڈی ایس پی صدر میاں جبار، ایس ایچ او تھانہ دینہ محمد عمران سمیت پولیس کی بھاری نفری موقع پر پہنچ گئی اور مدعی کی درخواست پر مقدمہ درج کر کے ڈاکوؤں کی تلاش شروع کر دی، واردات کے بعد علاقہ میں خوف و ہراس پھیل گیا۔
تفصیلات کے مطابق دینہ جی ٹی روڈ پر دن 12 بجے کے قریب ڈکیتی کی بڑی واردات ہوئی۔ 3 نامعلوم مسلح نقاب پوش ڈاکوؤں نے سابق پی ٹی آئی رہنما چوہدری زاہد اختر کے اٹک پٹرول پمپ کے 2 ملازمین محمد یونس اور محمد یاسر پمپ کی سیل ایچ بی ایل بینک منگلا روڈ دینہ میں جمع کروانے کے لیے اپنے موٹرسائیکل پر پمپ سے نکلے ہی تھے کہ روہتاس روڈ کے سامنے پل کی چڑھائی چڑھتے ہوئے ڈاکوؤں نے گھیر لیا۔
ڈاکوؤں نےجان سے مار دینے کی دھمکی دیتے ہوئے پیسوں سے بھرا بیگ جس میں 53 لاکھ 30 ہزار کی نقدی چھین لی۔ ڈاکو واردات کے بعد فرار ہونے میں کامیاب ہو گئے۔
واردات کی اطلاع ملتے ہی ڈی ایس پی صدر میاں جبار اور ایس ایچ او تھانہ دینہ محمد عمران اپنی بھاری نفری کے ہمراہ موقع پر پہنچ گئے اور پمپ کے ملازم محمد یونس کی درخواست پر نامعلوم ڈاکوؤں کے خلاف مقدمہ درج کر لیا اور ڈاکوؤں کی تلاش شروع کر دی، واردات کے بعد علاقہ میں شدید خوف وہراس پھیل گیا۔