جہلم شہر سمیت ضلع بھر میں یوٹیلیٹی اسٹورز پر برانڈز نے اپنی قیمتوں میں اضافہ کر دیا

جہلم: مہنگائی میں پسے عوام پر ایک اور بم گرا دیا گیا، یوٹیلیٹی اسٹورز پر مختلف برانڈز نے اپنی قیمتوں میں غیر معمولی اضافہ کر دیا۔ یوٹیلیٹی اسٹورز کارپوریشن نے قیمتوں میں اضافے پر عملدرآمد شروع کر دیا۔

نوٹیفکیشن کے مطابق شہر سمیت ضلع بھر میں یوٹیلیٹی اسٹورز برانڈز نے اپنی قیمتوں میں اضافہ کر دیا ہے، متعدد اشیاء کی قیمتیں بڑھادی گئی ہیں، قیمتوں میں اضافے کا اطلاق فوری طور پر لاگو ہو چکا ہے۔

نوٹیفکیشن کے مطابق برانڈڈ کارن آئل کی فی لیٹر قیمت میں 300 روپے تک کا اضافہ کرکے آئل کی فی لیٹر قیمت 1170 روپے کر دی گئی ہے۔ دوسری جانب بچوں کے 800 گرام فارمولا مِلک کی قیمت 820 روپے بڑھا کر 4 ہزار 445 روپے کر دی گئی ہے، 330 گرام سیری لیک450 روپے تک مہنگا ہوکر 1198 روپے کا ہوگیا ، ایک لیٹر فروٹ جوس 70 روپے تک مہنگا ہوا ہے، 336 گرام نوڈلز 60 روپے تک مہنگا ہوکر 425 روپے کا ہو گیاہے۔

نوٹیفکیشن کے مطابق 800 گرام کیچپ کی قیمت میں 50 روپے تک کا اضافہ کیا گیا ہے، بچوں کے ڈائپرز کی قیمتوں میں 350 روپے تک کا اضافہ ہوا ہے، 650 ملی لیٹر شیمپوکی قیمت میں 210 روپے تک کا اضافہ ہوا ہے، 1 کلو کپڑے دھونے کا پاؤڈر 59 روپے تک مہنگا کر دیاگیا ہے، 130 گرام صابن 30 روپے، ہینڈ واش 21 روپے، ٹوائلٹ رول 10 روپے، ٹشو پیپرکا ڈبہ 43 روپے تک مہنگا کر دیا گیاہے۔

یوٹیلیٹی اسٹورز پر باڈی واش،گارلک ساس، چکن، چیز نوڈلز کی قیمتوں میں بھی غیر معمولی اضافہ کر دیا گیا ہے۔