دہشتگردوں کے ساتھ مفاہمت کی پالیسی نے مسائل پیدا کیے، بلاول بھٹو
وزیر خارجہ بلاول بھٹو زرداری نے الزام لگایا کہ کالعدم تحریک طالبان پاکستان (ٹی ٹی پی) سے متعلق پاکستان تحریک انصاف (پی ٹی آئی) کی سابق حکومت کی پالیسی غلط تھی۔
رپورٹ کے مطابق بلاول بھٹو نے گزشتہ روز غیر ملکی نشریاتی ادارے الجزیرہ کو انٹرویو دیتے ہوئے کہا کہ غلط پالیسیوں کی وجہ سے ہی پاکستانی عوام کو مشکلات کا سامنا کرنا پڑا تاہم اتحادی حکومت نے اس غلط پالیسی کو ختم کیا جو گزشتہ حکومت (پی ٹی آئی) کی جانب سے شروع کی گئی تھی۔
Live: Chairman PPP & Foreign Minister @BBhuttoZardari’s Interview with Al-Jazeera https://t.co/kSmjXz6ydg
— PPP (@MediaCellPPP) January 17, 2023
خیال رہے کہ رواں ماہ کے اوائل میں پاکستان کی فوج اور سیاست کی اعلیٰ قیادت نے تمام دہشت گردوں کے خلاف سخت کارروائی کرنے کا فیصلہ کیا۔
وزیر خارجہ نے کہا کہ افغان طالبان کی جانب سے خواتین کی تعلیم پر پابندی اور فلاحی اداروں کے اہلکاروں اور میڈیا پر عائد پابندیوں کے باوجود عالمی برادری کو طالبان کے ساتھ بات چیت کرنی چاہیے اور انہیں اپنے وعدوں پر قائل کرنا چاہیے۔
انہوں نے کہا کہ افغان حکومت سے بات چیت ہی مسائل کا حل ہے اور انہیں عالمی برادری سے کیے گئے وعدوں کو پورا کرنے کے لیے قائل کرنا لازمی ہے، چاہے وہ خواتین کے حقوق یا دہشت گردی کے حوالے سے ہوں ۔