امن و امان کو برقرار رکھنے میں علماء کرام کا کردار انتہائی اہمیت کا حامل ہے۔ ڈپٹی کمشنر، ڈی پی او جہلم
جہلم: ڈپٹی کمشنر جہلم کیپٹن (ر) سمیع اللہ فاروق اور ڈسٹرکٹ پولیس آفیسر جہلم ناصر محمود باجوہ نے ضلعی امن کمیٹی کے ممبران اور علماء کرام کے ساتھ میٹنگ کا انعقاد کیا۔
تفصیلات کے مطابق جہلم شہر میں امن و امان کے حوالے سے امن کمیٹی کے ممبران کے ساتھ میٹنگ کا انعقاد کیا گیا، میٹنگ میں مذہبی ہم آہنگی، بھائی چارے اور امن و امان کے قیام کے حوالے سے مشاورت کی گئی۔
میٹنگ میں بتایا گیا کہ ڈی پی او جہلم نے شہر کے مختلف گرجا گھروں کا وزٹ کیا، پولیس افسران کو چیک کیا اور سکیورٹی انتظامات کے حوالے سے ہدایات دیں اور کہا کہ ضلع بھر میں پولیس فورس الرٹ ڈیوٹی سر انجام دے رہی ہے۔
ممبران امن کمیٹی نے کہا کہ شہر بھر میں امن و امان کے قیام کے لیے انتظامیہ اور اداروں کے ساتھ کھڑے ہیں۔
ڈی سی جہلم کیپٹن (ر) سمیع اللہ فاروق اور ڈی پی او جہلم ناصر محمود باجوہ نے کہا کہ امن و امان کو برقرار رکھنے میں علماء کرام کا کردار انتہائی اہمیت کا حامل ہے، امن و امان کی فضا کو برقرار رکھنے کے لیے تمام وسائل بروئے کار لائے جا رہے ہیں۔