شہدائے پولیس پوری قوم کا فخر ہیں۔ ڈپٹی کمشنر جہلم سمیع اللہ فاروق
جہلم: ڈپٹی کمشنر جہلم کیپٹن (ر) سمیع اللہ فاروق نے کہا ہے کہ شہدائے پولیس پوری قوم کا فخر ہیں جنہوں نے جرائم پیشہ عناصر سے معاشرے کو پاک کرنے کی کوشش کے دوران جام شہادت نوش کرکے ہماری نسلوں کو محفوظ بنایا۔
انہوں نے گزشتہ روز یوم شہدائے پولیس کے حوالے سے مقامی ہوٹل میں منعقدہ تقریب سے بطور مہمان خصوصی گفتگو کرتے ہوئے کہا کہ شہداء کسی بھی قوم کے شاندار ماضی اور روشن مستقبل کی ضمانت ہوتے ہیں، شہداء کے اہلخانہ کو ہر لحاظ امتیازی حیثیت حاصل ہے۔
اس موقع پر ممتاز سکالر بابا عرفان الحق، اسٹیشن کمانڈر جہلم، صدر ڈسٹرکٹ بار اور دیگر سماجی شخصیات بھی موجود تھیں۔
ڈپٹی کمشنر کیپٹن (ر) سمیع اللہ فاروق نے تمام شہدا پولیس ضلع جہلم کو زبردست خراج تحسین پیش کیا اور ان کے خاندانوں کو ضلعی انتظامیہ کی جانب سے ہر قسم کے تعاون اور مدد کی یقین دہانی کروائی۔
تقریب کے آخر میں شہدائے پولیس کے اہلخانہ میں تحائف بھی تقسیم کئے۔