عمران خان کی غلط پالیسیوں سے عوام مہنگائی کی چکی میں پس رہی ہے۔ چوہدری لال حسین
جہلم: چوہدری لال حسین نے کہا کہ پاکستان مشکل حالات سے گزر رہا ہے، عمران خان کی غلط پالیسیوں سے عوام مہنگائی کی چکی میں پس رہی ہے، موجودہ حکومت عوام کو ریلیف دینے کے لیے بھر پور کوششیں کر رہی ہیں، وزیراعظم محمد شہباز شریف نے ماہ رمضان میں عوام کی سہولت کے لئے مفت آٹے کی فراہمی کو یقینی بنایا جو بہت بڑا اقدام تھا۔
پاکستان مسلم لیگ (ن) کے صوبائی رہنما سابق ممبر پنجاب اسمبلی چوہدری لال حسین نے گھرمالہ ہاؤس میں صحافیوں سے ایک ملاقات کے دوران خصوصی گفتگو کرتے ہوئے کہا کہ شریف برادران کی ملک اور قوم کے لیے خدمات بے مثال ہیں۔
انہوں نے کہا کہ سابق وزیراعظم میاں محمد نواز شریف نے ملک بھر میں بڑے بڑے منصوبے مکمل کیے جس سے عوام کو ریلیف ملا ، موٹر وے، میٹرو بس سروس شروع کیں ، سی پیک کا منصوبہ شروع کیا ہم نے اپنے دور اقتدار میں ضلع جہلم کے عوام کی بلا تفریق خدمت کی، سینکڑوں دیہاتوں میں رابطہ سڑکیں تعمیر کروائیں۔
چوہدری لال حسین نے کہا کہ شہر سے ملحقہ علاقوں میں سوئی گیس فراہم کی ، میاں محمد نواز شریف وہ واحد لیڈر ہے جو ملک کو بحران سے نکال سکتے ہیں، جتنی خدمت شریف براردان نے ملکِ پاکستان کی، پاکستان کی تاریخ میں اس کی مثال نہیں ملتی۔ قائد محمد نواز شریف کی قیادت میں مسلم لیگ (ن) پورے پاکستان میں پوری طرح متحد ہے اور ان کی صاحبزادی مریم نوازپاکستان مسلم لیگ (ن) کو عوامی جماعت بنانے کے لیے دن رات کوشاں ہے۔
اس موقع پرتحصیل صدر چوہدری راشد گھرمالہ، ضلعی صدر چوہدری بوٹا جاوید بھی موجود تھے۔