حضور پاک ﷺ کی محبت ہمارے ایمان کی اساس اور روح کی غذا ہے۔ حاجی رشید چوہدری
دینہ: حضور پاک ﷺ کی محبت ہمار ے ایمان کی اساس اور روح کی غذا ہے۔ آپ ﷺ کی زندگی ہمارے لئے مشعل راہ کی حیثیت رکھتی ہے اور حضور پاک ﷺ کی ولادت بے مثل و بے مثال ہے۔
ان خیالات کا اظہار حاجی محمد رشید چوہدری جنرل سیکرٹری مرکزی میلاد کمیٹی دینہ نے صحافیوں سے گفتگو کرتے ہوئے کیا۔ انہوں نے کہا کہ تمام عالم ِ اسلام کو ماہ ِ ربیع الاو ل شریف کی آمد پر دلی مبارک باد پیش کرتا ہوں۔ حضور نبی کریم ﷺ تشریف لائے تو دل جگمگااُٹھے، آپ ﷺ کا دنیا میں تشریف لانا ہمارے لئے باعث ِ رحمت ہے۔ عید میلاد النبی ﷺ کے نور سے ہی کائنات نور النور ہے۔
انہوں نے کہا کہ مومن حضور ﷺ کا جشن ِ ولادت مناکر اللہ تعالیٰ کی توحید اور وحدنیت کا اعلان کرتے ہیں۔ اگر دنیا آج آباد ہے تو یہ آپ ﷺ کا صدقہ ہے کیونکہ حضور صلی اللہ علیہ وآلہ وسلم اللہ تعالیٰ کے محبوب ہیں اور آپ کے لئے ہی دنیا کو بنایا گیا۔
حاجی محمد رشید چوہدری نے کہا کہ آمد ِ مصطفی ﷺ سے پہلے جسم تھے احساس نہ تھا، عام تھے مگر وہ خاص نہ تھے، زمین تھی سبزہ نہ تھا، دل تھے دھڑکن نہ تھی، گلشن میں پھول تھے مہک نہ تھی، ستارے تھے چمک نہ تھی، زبانیں تھیں صداقت نہ تھی، غم تھے مسرت نہ تھی، آنکھیں تھیں مگر حیا ء نہ تھی، زندگی تھی بندگی نہ تھی۔ ان حالات میں رحمت ِ خداوندی جوش میں آئی اور حضور نبی کریم ﷺ کو انسانیت کی رہنمائی کیلئے دنیا میں رحمت بنا کر بھیجا۔
انہوں نے بتایا کہا کہ ان شاء اللہ 12 ربیع الاول 29 ستمبر بروز جمعۃ المبارک صبح 9 بجے ایک بہت بڑے جلوس کے پروگرام کو حتمی شکل دے دی گئی ہے۔ عید میلاد النبی ﷺ کے سلسلے میں مرکزی میلاد کمیٹی کے زیر اہتمام مرکزی جلوس میلاد چوک دینہ سے زیر قیادت پیر طریقت رہبر شریعت حضرت خواجہ پیر محمد زکریا نعمانی آستانہ عالیہ ڈھنگروٹ شریف روانہ ہوگا۔
حاجی محمد رشید چوہدری نے بتایا کہ مرکزی جلوس میں اُستاد القراء علامہ مولانا قاری محمد یوسف سیالوی جامعہ رضویہ احسن القرآن ٹھیکریاں دینہ، علامہ مفتی فضل رسول شاہد خطیب اعظم مرکزی جامع مسجد میلاد چوک دینہ، مولانا سید عبدالقدیر شاہ کاظمی، افتخار احمد مغل (ABCD)، چوہدری جاوید انجمن فدایان ڈھنگروٹ شریف، علامہ محمد ریاض الحسن چشتی، علامہ شہزاد عامر، علامہ محمد عرفان، علامہ محمد منظور چشتی (الکرم فرینڈز) علامہ محمد عارف (تحریک منہاج القرآن)، علامہ خالد نسیم ہجویری مرکزی میلاد کمیٹی محمد جمیل بٹ انجمن محبان نور رسالت، حاجی محمد شفیق دعوت اسلامی، انجمن طلباء اسلام، بزم ِ رضائے مصطفےٰ، تنظیم المساجد فیضان مدینہ میلاد کمیٹی مرحبا میلاد کمیٹی، زم زم میلاد کمیٹی اور دیگر تنظیمات سمیت شہری، سماجی، سیاسی، صحافی برادری سمیت دیگر شخصیات بھی جلوس میں شامل ہوں گی۔
انہوں نے بتایا کہ تمام جلوس ریلوے روڈ، ریلوے اسٹیشن روڈ، غلہ منڈی، جی ٹی روڈ، منگلا روڈ، داتا روڈ اور مین بازار سے ہوتے ہوئے میلاد چوک دینہ میں اختتام پذیر ہوں گے۔ جلوس کے اختتام پر تمام تنظیمات میں انعامات تقسیم کئے جائیں گے اور المصطفیٰ بزنس کمیونٹی دینہ کی جانب سے لنگر تقسیم کیا جائے گا۔
جنرل سیکرٹری مرکزی میلاد کمیٹی دینہ نے کہا کہ تمام عاشقان رسول سے گزارش ہے کہ باوضو ہو کر جلوس میں شامل ہوں اپنے مکانوں، دکانوں، محلے،بازار، گلیوں اور مساجد کو جھنڈیوں اور لائٹوں سے سجا کر عاشق رسول صلی اللہ علیہ وآلہ وسلم ہونے کا ثبوت دیں۔ 12 ربیع الاول بعد از نماز مغرب انجمن طلباء اسلام کے زیر اہتمام ایک مشعل بردار جلوس مغل آئرن سٹور منگلا روڈ دینہ سے نکالا جائے گا۔
حاجی محمد رشید چوہدری نے کہا کہ 24 ستمبر 2023ء بعد از نماز ِ عشاء ATI کے زیر اہتمام مقابلہ حسن ِ نعت اقبال ہوٹل جی ٹی روڈ دینہ میں منعقد ہوگا۔ اس کے علاوہ میلاد شریف کے سلسلہ میں مختلف جامع مساجد میں محافل کا انعقاد بھی ہوگا۔ تمام احباب اہل ایمان میلاد شریف کے تمام پروگراموں میں بھرپور شرکت فرمائیں۔