اڈیالہ جیل سے رہائی کے بعد فواد چوہدری کا پہلا بیان سامنے آگیا
سوہاوہ: تحریک انصاف کے رہنما فواد چوہدری نے کہاہے کہ اگر جہلم اور میانوالی کے اراکین اسمبلی غدار ہیں تو پھر محب وطن کون ہے۔
رہائی کے موقع پر اڈیالہ جیل کے باہر کارکنوں سے خطاب کرتے ہوئے فواد چوہدری کا کہنا تھا کہ پشاور میں ہونیوالا دھماکہ افسوسناک ہے، عمران خان نے پہلے ہی کہہ دیا تھا کہ حکومت کی غلط پالیسیوں کی وجہ سے دہشت گرد پھر سے سر اٹھائیں گے۔
انہوں نے کہا کہ حکومت کی توجہ شہریوں کو سکیورٹی دینے کے بجائے عمران خان کو مائنس کرنے پر مرکوز ہے، یہ لوگ نہیں جانتے کہ عمران خان کے بغیر پاکستان کی تاریخ نامکمل ہے۔
اس موقع پر فوادچوہدری نے گرفتاری کی مذمت کرنے پر شاہد خاقان عباسی، حنیف عباسی، مصطفیٰ نواز کھوکھر اور جماعت اسلامی کے رہنماؤں کا شکریہ ادا کیا۔
فواد چوہدری نے اپنی رہائی کے لیے آواز اٹھانے پر تحریک انصاف کا بھی شکریہ ادا کیا اور فرخ حبیب کی کاوشوں کو خصوصی طور پر سراہا۔