پنجاب کی جیلوں میں تعینات سپرنٹنڈنٹ کو پہلی بار نئی گاڑیاں مل گئیں

جہلم: محکمہ جیل خانہ جات پنجاب کی 165 سالہ تاریخ میں پہلی بار جیل سپرنٹنڈنٹس کو سرکاری گاڑیاں دے دی گئیں۔

آئی جی جیل خانہ جات نے گاڑیوں کی چابیاں متعلقہ جیل کے سپرنٹنڈنٹس کے حوالے کیں، سرکاری کرولا گاڑیاں ٹھوکر نیازبیگ میں واقع شوروم میں منعقدہ تقریب کے موقع پرسپر نٹنڈنٹس کے حوالہ کیں گئیں ۔

آئی جی جیل خانہ جات پنجاب نے کہا کہ نگران وزیر اعلی پنجاب محسن نقوی، چیف سیکرٹری پنجاب اور ایڈیشنل چیف سیکرٹری پنجاب کی خصوصی ہدایات پر پنجاب کی جیلوں کے سپرنٹنڈنٹس کوسرکاری گاڑیاں دی گئی ہیں۔ محکمہ جیل خانہ جات پنجاب میں ایک نئی تاریخ رقم ہوئی ہے حکومت کی ترجیحات کے مطابق سیکورٹی اور جیل ریفارمز کے حوالے سے کوئی دقیقہ فرو گزاشت نہیں کریں گے۔

فاروق نذیر کا مزید کہناتھا کہ گاڑیاں جیل سپرنٹنڈنٹس کے سپرد کی جا رہی ہیں، پنجاب کی 43 جیلوں کے 30 سپر نٹنڈنٹس کو 30 سرکاری گاڑیاں دیدی گئی ہیں جبکہ چند روز بعد دوسرے مرحلہ میں باقی 13جیلوں کے سپر نٹنڈنٹس کو بھی نئی گاڑیاں حوالے کر دی جائیں گی۔