پنڈدادنخان میں 2 بین الصوبائی ڈکیت گینگ کے 5 کارندے گرفتار، ایک کروڑ سے زائد مالیت کا مال مسروقہ برآمد
جہلم/ پنڈدادنخان: جہلم پولیس نے بڑی کارروائیاں کرتے ہوئے 2 بین الصوبائی ڈکیت گینگ کے پانچ کارندے پکڑ لئے، ایک کروڑ روپے سے زائد مالیت کا مال مسروقہ اور اسلحہ برآمد کر لیا گیا، ملزمان سے تفتیش جاری ہے، مزید انکشافات متوقع ہیں۔
تفصیلات کے مطابق جہلم کی تحصیل پنڈدادنخان کے تھانہ للِہ کے ایس ایچ او ناصر محمود اور ٹیم نے کارروائی کرتے ہوئے اعظم موٹو فیصل آبادی خطرناک ڈکیت گینگ کے ملزمان علی اشرف، علی عمران اور اعظم علی کو گرفتار کر لیا، ملزمان سے مال مسروقہ کار مالیتی 42 لاکھ، متعدد وارداتوں میں چھینے گئے طلائی زیورات کل مالیتی 31 لاکھ 32 ہزار روپے، چھینی گئی نقدی مالیتی 32 لاکھ روپے اور دیگر گھریلو سامان مالیتی 10 لاکھ روپے سے زائد بر آمد کر لئے گئے۔
ڈکیت گینگ سے ریکوری کا مجموعی تخمینہ 1 کروڑ 6 لاکھ روپے ہے جبکہ وارداتوں میں استعمال ہونے والا اسلحہ ناجائز ، پسٹل 9 ایم ایم،پسٹل30. بور اور کلاشنکوف معہ ایمونیشن بھی بر آمد کر لیا گیا۔
ملزمان ضلع جہلم کے علاوہ خوشاب، لیّہ، فیصل آباد اور پنجاب کے کئی دیگر اضلاع کی وارداتوں میں بھی ملوث ہیں جن سے مزید انکشافات کی بھی توقع ہے۔
ایس ایچ او تھانہ للِہ ناصر محمود اور ٹیم نے دوسری بڑی کارروائی کرتے ہوئے نوما ڈکیت گینگ کے 2 کارندوں نعمان شہزاد اور عدیل حسن کو گرفتار کر لیا، ملزمان سے چھینی گئی نقدی 2 لاکھ 34ہزار روپے، 4 عدد مسروقہ موٹرسائیکلز، وارداتوں میں استعمال ہونے والا ناجائز اسلحہ پسٹل30بور معہ ایمونیشن اور ایک عدد موبائل فون برآمد کر لیا۔
ڈی پی او جہلم ناصر محمود باجوہ نے کہا کہ شہریوں کی جان و مال کی حفاظت کو یقینی بنانے کے لیے تمام تر وسائل بروئے کار لائے جا رہے ہیں۔ ملزمان کو ٹھوس شواہد کے ساتھ چالان عدالت کیا جائے گا، اس امر کو یقینی بنایا جائے گا کہ ملزمان قرار واقعی سزا کےمستحق ٹھہریں۔
ڈی پی او جہلم نے للِہ پولیس کی شاندار کامیابی پر ڈی ایس پی پنڈ دادنخان اور ایس ایچ او للِہ کو خصوصی شاباش اور انعامات کا اعلان کیا۔
