محرم الحرام؛ تمام سکیورٹی ادارے مل کر امن و امان کو یقینی بنائیں گے، ڈپٹی کمشنر جہلم سیدہ رملہ علی

جہلم: جہلم میں محرم الحرام کی سکیورٹی اور ممکنہ سیلابی صورتحال سے نمٹنے کے حوالے سے ڈپٹی کمشنر جہلم سیدہ رملہ علی کی زیر صدارت ایک اہم اجلاس منعقد ہوا جس میں تمام متعلقہ ضلعی افسران سمیت پاک فوج کے نمائندگان نے شرکت کی۔

اجلاس میں بتایا گیا کہ محرم الحرام کے جلوسوں کو بہترین سکیورٹی فراہم کی جائے گی، پولیس اور رینجرز جلوسوں کو سکیورٹی فراہم کریں گی جبکہ پاک فوج کی کمپنیاں ریزرو فورس کے طور پر ضلعی انتظامیہ کی کال پر فوری ایکشن کے لیے دستیاب ہوں گی۔

پاک فوج کے نمائندے نے محرم الحرام اور آئندہ موسم برسات میں ممکنہ سیلابی صورتحال سے نمٹنے کے لیے پلان پر بریفنگ دی۔ انہوں نے کہا کہ پاک فوج ہر دم تیار ہے اور کسی بھی ہنگامی صورتحال میں ضلعی انتظامیہ کے ساتھ مل کر کام کرے گی۔

ڈپٹی کمشنر جہلم نے کہا کہ تمام سکیورٹی ادارے مل کر امن و امان کو یقینی بنائیں گے، محرم الحرام کے دوران تمام حساس مقامات پر سکیورٹی ہائی الرٹ رہے گی، جلوسوں کے راستوں پر CCTV کیمرے نصب کیے جائیں گے اور مانیٹرنگ کے لیے کنٹرول روم قائم کیا جائے گا۔