جہلم میں ضلعی امن کمیٹی کا اجلاس، عید میلادالنبی ﷺ کو شایان شان طریقے سے منانے پر تبادلہ خیال
جہلم: ڈپٹی کمشنر جہلم سیدہ رملہ علی کی زیر صدارت ضلعی امن کمیٹی کا اجلاس، عید میلادالنبی ﷺ کو شایان شان طریقے سے منانے پر تبادلہ خیال کیا گیا۔
تفصیلات کے مطابق جہلم شہر میں جشن عید میلاد النبی ﷺ کو شایان شان طریقے سے منانے پر مختلف مسالک کے علما کرام اور نمائندگان کے ساتھ خصوصی اجلاس منعقد کیا گیا۔
اجلاس میں ایڈیشنل ڈپٹی کمشنر جنرل صباء سحر، اسسٹنٹ کمشنر کوارڈینیشن حافظ محمد زنیر یونس، ایس پی انویسٹی گیشن راجہ حسیب، سماجی شخصیت چوہدری عارف، قاری عمر فاروق، سید باقر علی شاہ، سید حسن شاہ، قاری باسط، حافظ اظہر اقبال، حافظ ظفر اقبال, ارشد نظام عطاری اور دیگر تنظیموں کے نمائندگان نے جہلم، دینہ، سوہاوہ سے شرکت کی۔
اجلاس میں عید میلادالنبی ﷺ کے جلوسوں کو بہترین انداز میں منعقد کرنے، محافل کے انعقاد کے لیے بہترین سہولیات فراہم کرنے بارے مختلف تجاویز پر غور کیا گیا۔
ڈپٹی کمشنر سیدہ رملہ علی نے اجلاس سے خطاب کرتے ہوئے کہا کہ عید میلادالنبی ﷺ کے بابرکت موقع پر بین المسالک ہم آہنگی کو فروغ دینا ضروری ہے۔
علما کرام نے اس حوالے سے بھی اپنی تجاویز پیش کیں جن پر مکمل عمل درآمد کی یقین دہانی کرائی گئی۔
