ضلع جہلم میں پنجاب کسان کارڈ کی تقسیم کا عمل خوش اسلوبی سے جاری ہے، چوہدری ندیم خادم

دینہ/ جہلم: چوہدری ندیم خادم نے کہا کہ وزیراعلیٰ پنجاب مریم نواز کے کسان دوست ویژن کے مطابق ضلع جہلم میں پنجاب کسان کارڈ کی تقسیم کا عمل خوش اسلوبی سے جاری ہے۔

سابق ایم پی اے و چیئرمین کمیٹی ضلع جہلم برائے وزیراعلیٰ پنجاب انیشیٹوز چوہدری ندیم خادم نے محکمہ زراعت (توسیع) جہلم کے دفتر میں کسان کارڈ کی باقاعدہ تقسیم کی اور کسانوں کو وزیراعلیٰ پنجاب کے کسان دوست منصوبوں سے آگاہ کیا۔

اس موقع پرانہوں نے کسانوں سے گفتگو کرتے ہوئے کہا کہ ضلع جہلم کی چاروں تحصیلوں میں کسان کارڈ کی تقسیم کا عمل جاری ہے اور کسان کارڈ کے ذریعے بلا سود قرضوں کے علاوہ گرین ٹریکٹر سکیم، کھادوں، زرعی آلات، ادویات اور بیج پر سبسڈی دی جا رہی ہے

چوہدری ندیم خادم نے بتایا کہ1 ایکڑ سے 12 اعشاریہ 5 ایکڑ رقبے تک کا مالک کاشتکار اس سکیم کا اہل ہوگا۔ کسان کارڈ کے حصول کے لیے زمیندار اپنی رجسٹرڈ سم سے PKC لکھ کر سپیس کے بعد اپنا شناختی کارڈ لکھ کر 8070 پر سینڈ کریں جس کے بعد زمیندار کو کسان کارڈ کے حصول کا میسج موصول ہوگا ۔

انہوں نے کہا کہ کھیتی باڑی سے وابستہ افراد نے اس اسکیم کو شعبہ زراعت کی ترقی اور کسانوں کی خوشحالی کے لیے ممد و معاون قرار دیا ہے۔

اس موقع پر چوہدری عابد جاوید پرنسپل زراعت آفیسر (توسیع) جہلم سمیت کسانوں کی کثیر تعداد موجود تھی۔ آخر میں چوہدری عابد جاوید نے کسانوں کو حکومت پنجاب کی دوسری اسکیموں کے بارے میں آگاہ کیا۔