اوورسیز پاکستانی کے صاحبزادے کی شاندار تعلیمی کامیابی، ساتویں جماعت میں پہلی پوزیشن حاصل کر لی
دینہ: اوورسیز پاکستانی اور سابق سپرٹ اسکول کے ایم ڈی محبوب احمد منہاس کے صاحبزادے علی حسن نے نجی تعلیمی ادارے ایجوکیٹر اسکول ٹیپو کیمپس دینہ میں ساتویں جماعت میں پہلی پوزیشن حاصل کر کے والدین، اساتذہ اور عزیز و اقارب کا سر فخر سے بلند کر دیا۔
علی حسن کے بہن بھائی بھی اپنی اپنی کلاسز میں نمایاں کارکردگی دکھاتے رہے ہیں اور وہ بھی انہی کے نقش قدم پر چلتے ہوئے ہر جماعت میں اول پوزیشن حاصل کر رہے ہیں۔ ان کی اس کامیابی پر عزیز و اقارب اور اساتذہ کی جانب سے مبارکبادوں کا سلسلہ جاری ہے۔
میڈیا سے گفتگو کرتے ہوئے علی حسن نے اپنے مستقبل کے خواب کا اظہار کرتے ہوئے کہا کہ وہ بڑے ہو کر ایک بہترین کار ڈیزائن کرنا چاہتے ہیں۔ اپنی اس خواہش کو پورا کرنے کے لیے وہ نہ صرف تعلیم میں محنت کر رہے ہیں بلکہ گاڑیوں کے متعلق بھی وسیع معلومات حاصل کر رہے ہیں۔
علی حسن کی کامیابی ان کی محنت، لگن اور اساتذہ کی رہنمائی کا نتیجہ ہے، اور اہلِ علاقہ نے امید ظاہر کی ہے کہ وہ مستقبل میں بھی تعلیمی میدان میں اپنی کامیابیوں کا تسلسل برقرار رکھیں گے۔
