ضلعی امن کمیٹی کا اجلاس، یوم شہادت حضرت علیؑ کے لیے سیکیورٹی انتظامات کا جائزہ لیا
جہلم: ڈپٹی کمشنر جہلم میثم عباس کی زیر صدارت ضلعی امن کمیٹی کا اجلاس منعقد ہوا۔
اجلاس میں مختلف مسالک کے علماء کرام، سیکیورٹی اداروں کے افسران اور ضلعی انتظامیہ کے نمائندوں نے شرکت کی۔ اجلاس کا مقصد یوم شہادت حضرت علیؑ کے موقع پر سیکیورٹی اور انتظامی امور کا تفصیلی جائزہ لینا تھا۔
اجلاس کے دوران ڈپٹی کمشنر میثم عباس نے کہا کہ موجودہ ملکی صورتحال میں امن و امان کی اہمیت پہلے سے کہیں زیادہ بڑھ چکی ہے اور اس حوالے سے تمام مسالک کے علماء کرام کا کردار کلیدی حیثیت رکھتا ہے۔
انہوں نے مزید کہا کہ علماء کرام اپنے خطبات میں مذہبی ہم آہنگی، رواداری اور ایک دوسرے کے عقائد کے احترام کا درس دیں تاکہ ضلع میں مثالی امن و امان کو یقینی بنایا جا سکے۔
علماء کرام نے اجلاس میں اپنے مکمل تعاون کی یقین دہانی کراتے ہوئے کہا کہ وہ ماضی کی طرح اس بار بھی انتظامیہ کے ساتھ شانہ بشانہ کھڑے ہیں اور امن و امان کے قیام کے لیے اپنا کردار ادا کرتے رہیں گے۔
ضلعی امن کمیٹی کے ممبران نے اس عزم کا اظہار کیا کہ وہ پاکستان کے وسیع تر مفاد میں انتظامیہ اور سیکیورٹی اداروں کے ساتھ ہمیشہ مل کر کام کرتے رہے ہیں اور آئندہ بھی یہی روش برقرار رکھی جائے گی تاکہ پہلے کی طرح اس بار بھی یوم شہادت حضرت علیؓ کے سلسلے میں تمام پروگرامز پرامن ماحول میں مکمل ہوں۔
