جہلم پولیس کا منشیات فروشوں اور شراب سپلائرز کے خلاف ایکشن، 2 ملزمان ہیروئن اور شراب سمیت گرفتار

جہلم: تھانہ کالا گجراں پولیس کی منشیات فروشوں اور شراب سپلائرز کے خلاف کامیاب کارروائیاں، دو ملزمان کو ہیروئن اور شراب سمیت گرفتار کر لیا۔

تفصیلات کے مطابق جہلم میں تھانہ کالا گجراں پولیس نے ایس ایچ او کی قیادت میں دو مختلف کارروائیوں کے دوران منشیات فروش اور شراب سپلائی کرنے والے ملزمان کو گرفتار کر کے بھاری مقدار میں منشیات اور شراب برآمد کر لی۔

پہلی کارروائی میں پولیس نے ملزم اختر محمود کو گرفتار کیا جو شراب سپلائی کرنے میں ملوث تھا۔ ملزم کے قبضے سے 20 لیٹر شراب برآمد کی گئی۔ پولیس نے موقع پر کارروائی کرتے ہوئے ملزم کے خلاف مقدمہ درج کر کے قانونی کارروائی شروع کر دی ہے۔

دوسری بڑی کارروائی میں پولیس نے ملزم یوسف مسیح کو گرفتار کیا، جس کے قبضے سے 1 کلو 240 گرام ہیروئن برآمد ہوئی۔ ملزم کے خلاف تھانہ کالا گجراں میں انسداد منشیات ایکٹ کے تحت مقدمہ درج کیا گیا ہے۔

ڈسٹرکٹ پولیس آفیسر جہلم طارق عزیز سندھو کا کہنا ہے کہ منشیات فروش معاشرے کا ناسور ہیں، جن کے خلاف جہلم پولیس بھرپور کریک ڈاؤن جاری رکھے ہوئے ہے۔ انہوں نے عوام سے اپیل کی ہے کہ منشیات اور غیر قانونی سرگرمیوں میں ملوث عناصر کی نشاندہی میں پولیس کا ساتھ دیں تاکہ معاشرے کو محفوظ اور صحت مند بنایا جا سکے۔