جہلم میں چوری کی متعدد وارداتوں میں ملوث نگرا گینگ کی سرغنہ سمیت 5 خواتین گرفتار

جہلم کی تحصیل پنڈدادنخان میں چوری کی متعدد وارداتوں میں ملوث نگرا گینگ کی 5 خواتین کو پولیس نے گرفتار کر لیا۔

تفصیلات کے مطابق تھانہ پنڈدادنخان پولیس نے ایس ایچ او کی قیادت میں ایک اہم کارروائی کے دوران چوری کی متعدد وارداتوں میں ملوث خواتین پر مشتمل ‘نگرا گینگ’ کی سرغنہ سمیت پانچ ملزمان کو گرفتار کر لیا۔

پولیس کے مطابق گرفتار کی جانے والی خواتین میں نگرا، سائرہ، یاسمین، زرتاجہ اور عالیہ شامل ہیں۔ گرفتار خواتین کے قبضے سے چوری شدہ رقم 3 لاکھ 50 ہزار روپے برآمد کر لی گئی ہے۔

یہ خواتین مختلف وارداتوں میں ملوث رہ چکی ہیں اور ان کے خلاف تھانہ پنڈدادنخان میں باقاعدہ مقدمات درج کر لیے گئے ہیں۔

ترجمان پولیس کا کہنا ہے کہ ملزمات کے خلاف ٹھوس شواہد موجود ہیں اور انہیں جلد عدالت میں چالان کر کے قرار واقعی سزا دلوائی جائے گی۔ سنگین جرائم میں ملوث کسی بھی شخص کے ساتھ کوئی رعایت نہیں برتی جائے گی۔