جہلم کے سیلاب متاثرین کی بحالی، ضلعی انتظامیہ کی کارکردگی پر ریلیف کمشنر پنجاب کا اظہار اطمینان
جہلم: سیلاب سے متاثرہ علاقوں میں امدادی سرگرمیوں اور شہریوں کو ریلیف فراہم کرنے کے حوالے سے ضلعی انتظامیہ جہلم کی کارکردگی کو سراہا گیا ہے۔
ممبر بورڈ آف ریونیو و ریلیف کمشنر پنجاب نے ضلعی انتظامیہ جہلم کے ساتھ ویڈیو لنک اجلاس میں گفتگو کرتے ہوئے کہا کہ متاثرہ شہریوں کو جلد از جلد اپنے گھروں میں واپس بھیجنے کے انتظامات کیے جائیں اور امدادی سرگرمیوں میں مزید تیزی لائی جائے۔
اس موقع پر ڈپٹی کمشنر جہلم میثم عباس نے ضلع جہلم میں جاری امدادی سرگرمیوں پر تفصیلی بریفنگ دی۔ انہوں نے بتایا کہ ضلعی انتظامیہ کی جانب سے متاثرہ افراد کی بروقت ریسکیو، فلڈ ریلیف کیمپوں میں موجود شہریوں کو سہولیات کی فراہمی، نکاسی آب کے لیے کی جانے والی سرگرمیاں اور سیلاب سے متاثرہ علاقوں کی بحالی کا کام بھرپور طریقے سے جاری ہے۔
ریلیف کمشنر پنجاب نے ضلعی انتظامیہ کی کوششوں کو سراہتے ہوئے کہا کہ وزیراعلیٰ پنجاب مریم نواز کی خصوصی ہدایات پر سیلاب متاثرین کی جلد بحالی حکومت کی اولین ترجیح ہے۔ ان کا کہنا تھا کہ تمام علاقوں سے باقی ماندہ پانی فوری طور پر نکالا جائے، سڑکوں اور گزرگاہوں کو مکمل طور پر صاف کیا جائے اور متاثرہ علاقوں میں بنیادی سہولیات کو جلد از جلد بحال کیا جائے تاکہ معمولات زندگی جلد بحال ہو سکیں۔
انہوں نے مزید کہا کہ ضلعی انتظامیہ ریلیف اور بحالی کے تمام اقدامات کو تیز کرے اور سیلاب متاثرین کو ہر ممکن سہولیات فراہم کی جائیں تاکہ وہ جلد از جلد اپنی معمول کی زندگی کی طرف لوٹ سکیں۔
