جہلم میں غیرت کے نام پر بھائی نے 28 سالہ بہن کو گلا دبا کر قتل کر دیا

جہلم میں غیرت کے نام پر بھائی نے 28 سالہ بہن کو گلا دبا کر قتل کر دیا، پولیس نے ملزم کو گرفتار کر لیا۔

تفصیلات کے مطابق جہلم میں تھانہ چوٹالہ کے علاقے رسول نگر میں پسند کی شادی کی خواہش پر ابرار نامی شخص نے غیرت کے نام پر اپنی بہن کو گلا دبا کر قتل کر دیا۔ واقعے کے بعد پولیس نے ملزم کو موقع سے گرفتار کر لیا۔

پولیس ذرائع کے مطابق مقتولہ کی شناخت 28 سالہ عنبرین کے نام سے ہوئی ہے، جو طلاق یافتہ تھی اور اپنے بھائی کے گھر رہائش پذیر تھی۔

پولیس ذائع کا مزید کہنا ہے کہ مقتولہ اپنے بھائی کی مرضی کے خلاف پسند کی شادی کرنا چاہتی تھی جس پر بھائی ابرار کو شدید رنج تھا۔ اسی بات پر دونوں کے درمیان تنازع بڑھا اور ملزم نے اپنی بہن کو گلا دبا کر موت کے گھاٹ اتار دیا۔

اطلاع ملتے ہی تھانہ چوٹالہ پولیس موقع پر پہنچ گئی اور مقتولہ کی لاش کو پوسٹ مارٹم کے لیے ڈسٹرکٹ ہیڈ کوارٹر اسپتال جہلم منتقل کر دیا ۔

تھانہ چوٹالہ پولیس نے ملزم ابرار کو گرفتار کر کے تھانے منتقل کر دیا ہے، ابتدائی تفتیش میں ملزم نے اپنی بہن کو قتل کرنے کا اعتراف بھی کر لیا ہے۔ پولیس کی جانب سے ملزم سے مزید تفتیش جاری ہے۔