ڈپٹی کمشنر جہلم میر رضا اوزگن کا اولڈ ہوم "اپنا گھر” کا دورہ، بزرگوں کے ساتھ وقت گزارا

جہلم: ڈپٹی کمشنر جہلم میر رضا اوزگن نے روہتاس روڈ پر قائم اولڈ ہوم "اپنا گھر” کا خصوصی دورہ کیا، جہاں انہوں نے انتظامیہ کی فلاحی خدمات کو سراہتے ہوئے مکمل تعاون کی یقین دہانی کرائی۔

تفصیلات کے مطابق ڈپٹی کمشنر میر رضا اوزگن نے فلاحی جذبے کے تحت "اپنا گھر” اولڈ ہوم کا معائنہ کیا، جہاں بے سہارا اور معمر افراد کو رہائش، خوراک اور دیگر سہولیات فراہم کی جا رہی ہیں۔ اس موقع پر انہوں نے وہاں مقیم بزرگ شہریوں سے ملاقات کی، ان کے حالات زندگی کے بارے میں دریافت کیا اور ان کے ساتھ وقت گزارا۔

ڈپٹی کمشنر نے اولڈ ہوم میں فراہم کی جانے والی سہولیات، رہائشی انتظامات، طبی خدمات اور عملے کی کارکردگی کا بھی جائزہ لیا۔ انہوں نے انتظامیہ کی جانب سے معمر شہریوں کی فلاح و بہبود کے لیے کی جانے والی کاوشوں کو شاندار الفاظ میں خراجِ تحسین پیش کرتے ہوئے کہا کہ معاشرے کے ان افراد کی خدمت ایک عظیم انسانی فریضہ ہے۔

انہوں نے کہا کہ ضلعی انتظامیہ ایسے فلاحی اداروں کے ساتھ ہر ممکن تعاون جاری رکھے گی تاکہ معاشرے کے کمزور طبقے کو سہارا اور عزتِ نفس کے ساتھ زندگی گزارنے کا موقع فراہم کیا جا سکے۔