جہلم اور سوہاوہ میں پیشہ ور بھکاریوں کے خلاف پولیس کا بھرپور کریک ڈاؤن، 4 بھکاری گرفتار

1

جہلم: ضلع بھر میں پیشہ ور بھکاریوں کے خلاف پولیس نے بھرپور کریک ڈاؤن کرتے ہوئے چار پیشہ ور بھکاریوں کو گرفتار کر لیا۔

تفصیلات کے مطابق ڈسٹرکٹ پولیس آفیسر طارق عزیز سندھو کی خصوصی ہدایت پر ضلع بھر میں پیشہ ور بھکاریوں کے خلاف بھرپور کریک ڈاؤن جاری ہے۔ اسی سلسلے میں مختلف تھانوں کی پولیس نے کارروائیاں کرتے ہوئے مجموعی طور پر چار پیشہ ور بھکاری ملزمان کو گرفتار کر لیا ہے۔

تھانہ سوہاوہ پولیس نے کارروائی کرتے ہوئے دو پیشہ ور بھکاری ملزمان کو گرفتار کیا، جن کے خلاف علیحدہ علیحدہ مقدمات درج کیے گئے ہیں۔ اسی طرح تھانہ سٹی پولیس نے بھی کارروائی کرتے ہوئے دو پیشہ ور بھکاری ملزمان کو حراست میں لے لیا اور ان کے خلاف بھی الگ الگ مقدمات درج کر دیے گئے ہیں۔

ڈی پی او جہلم طارق عزیز سندھو نے اس حوالے سے کہا کہ پیشہ ور بھکاری مختلف شاہراہوں اور چوک چوراہوں پر کھڑے ہو کر نہ صرف ٹریفک کی روانی کو متاثر کرتے ہیں بلکہ حادثات کا سبب بھی بنتے ہیں، جس سے شہریوں کی جان و مال کو خطرات لاحق ہوتے ہیں۔ انہوں نے واضح کیا کہ ایسے عناصر کے خلاف بلاامتیاز کارروائیاں جاری رہیں گی۔

ڈی پی او جہلم نے شہریوں سے اپیل کی ہے کہ وہ پیشہ ور بھکاریوں کی حوصلہ شکنی کریں اور انہیں خیرات دینے سے گریز کریں، تاکہ اس منظم عمل کا خاتمہ ممکن بنایا جا سکے اور شہر میں نظم و ضبط اور ٹریفک کی روانی برقرار رکھی جا سکے۔