جہلم میں واسا کے بھاری بھرکم بلوں نے شہریوں کو پریشان کر دیا، شدید احتجاج
جہلم میں واٹر اینڈ سینیٹیشن ایجنسی (واسا) کی جانب سے سیوریج اور واٹر سپلائی کے بھاری بھرکم بلوں نے شہریوں میں شدید تشویش کی لہر دوڑا دی ہے۔
مختلف علاقوں کے مکینوں نے اضافی چارجز اور بنیادی سہولیات کی عدم فراہمی کے باوجود ہزاروں روپے کے بل بھجوانے پر شدید احتجاج کیا ہے۔
شہریوں کا کہنا ہے کہ بیشتر علاقوں میں نہ تو باقاعدہ واٹر سپلائی کا نظام موجود ہے اور نہ ہی سیوریج کی مکمل سہولیات فراہم کی جا رہی ہیں، اس کے باوجود واسا کی جانب سے ہزاروں روپے کے بل وصول کیے جا رہے ہیں۔
متاثرہ شہریوں کے مطابق بعض گھروں میں سرکاری واٹر سپلائی کنکشن موجود ہی نہیں، جبکہ کئی علاقوں میں سیوریج لائنیں تاحال بچھائی نہیں گئیں، اس کے باوجود سیوریج فیس کی مد میں بھاری رقوم شامل کر دی گئی ہیں۔
شہری حلقوں نے الزام عائد کیا ہے کہ واسا کی جانب سے مبینہ غلط ریڈنگ اور اضافی چارجز کے ذریعے عوام پر مالی بوجھ ڈالا جا رہا ہے، جبکہ اب زمین سے نکلنے والے پانی پر بھی بل وصول کیے جانے پر شدید تشویش پائی جا رہی ہے۔
شہریوں نے میڈیا نمائندگان سے گفتگو کرتے ہوئے کہا کہ واسا نے ابھی شہر میں سیوریج لائنیں بچھانے کا کام شروع کیا ہے لیکن سہولیات کی فراہمی سے قبل ہی بل بھجوانا عوام کے ساتھ زیادتی ہے۔
متاثرہ شہریوں نے اعلیٰ حکام سے مطالبہ کیا ہے کہ واسا کی جانب سے بھجوائے گئے بھاری بلوں کا فوری نوٹس لیا جائے، اضافی چارجز ختم کیے جائیں اور شہریوں کو حقیقی سہولیات کی فراہمی کے بعد ہی بلنگ کا نظام نافذ کیا جائے۔
