عیدالاضحیٰ ؛ ستھرا پنجاب ٹیم نے شاندار انداز میں ضلع جہلم میں صفائی کے فرائض سرانجام دیے، ڈاکٹر فضل الحق

جہلم: ڈاکٹر فضل الحق (فضلی) نے سُتھرا پنجاب مہم کے تحت عیدالاضحیٰ کے موقع پر ہونے والے صفائی آپریشن کو پنجاب حکومت کا ایک بہترین اور قابلِ تحسین اقدام قرار دیا ہے۔

پاکستان مسلم لیگ (ن) کے مرکزی رہنما و رکن قومی اسمبلی چوہدری فرخ الطاف کے پرسنل سیکرٹری ڈاکٹر فضل الحق (فضلی) نے اپنے بیان میں کہا کہ عیدالاضحیٰ کے تینوں دن سُتھرا پنجاب ٹیم نے ضلع جہلم کی چاروں تحصیلوں میں انتہائی شاندار انداز میں صفائی کے فرائض سرانجام دیے اور قربانی کے جانوروں کی آلائشوں کو بروقت ٹھکانے لگا کر عوام کو صاف ستھرا ماحول فراہم کیا۔

انہوں نے کہا کہ پنجاب حکومت کے اس اقدام کے تحت شہروں، قصبوں، دیہات، گلی محلوں اور چھوٹی بڑی سڑکوں پر بروقت صفائی کو یقینی بنایا گیا، جس سے شہریوں کو بہترین ماحول میسر آیا۔ ڈاکٹر فضل الحق (فضلی) نے کہا کہ سُتھرا پنجاب کے ورکرز نے دن رات محنت کرکے اپنی ذمہ داریاں احسن انداز میں نبھائیں اور عید کے ایام میں صفائی کے مثالی انتظامات کو ممکن بنایا، جو قابلِ تعریف ہیں۔

انہوں نے سُتھرا پنجاب ٹیم، ضلعی انتظامیہ اور متعلقہ اداروں کی کاوشوں کو سراہتے ہوئے کہا کہ عوام کو بھی صفائی برقرار رکھنے میں اپنا بھرپور کردار ادا کرنا چاہیے تاکہ ہمارا ضلع اور ہمارے شہر مزید خوبصورت، صاف ستھرے اور مثالی بن سکیں۔

ڈاکٹر فضل الحق (فضلی) نے اس امید کا اظہار کیا کہ پنجاب حکومت کے عوامی فلاح و بہبود کے ایسے منصوبے مستقبل میں بھی اسی جذبے کے ساتھ جاری رہیں گے اور شہریوں کو بہتر ماحول کی فراہمی میں اہم کردار ادا کرتے رہیں گے۔