جہلم میں فٹنس سرٹیفکیٹ کے بغیر چلنے والی گاڑیوں کے خلاف کریک ڈاؤن کا فیصلہ

جہلم: ضلع جہلم میں فٹنس سرٹیفکیٹ کے بغیر سڑکوں پر چلنے والی گاڑیوں کے خلاف ضلعی انتظامیہ اور متعلقہ محکموں نے سخت کارروائی کا فیصلہ کرلیا ہے جبکہ باقاعدہ کریک ڈاؤن 15 اکتوبر 2026ء سے شروع کیا جائے گا۔

رپورٹ کے مطابق ضلع جہلم کی سڑکوں پر چلنے والی ایسی گاڑیاں جن کے پاس لازمی فٹنس سرٹیفکیٹ موجود نہیں، ان کے خلاف قانون کے مطابق کارروائی عمل میں لائی جائے گی۔ متعلقہ حکام نے گاڑی مالکان اور ٹرانسپورٹرز کو ہدایت کی ہے کہ مقررہ تاریخ سے قبل اپنی گاڑیوں کی فٹنس مکمل کرواتے ہوئے تمام قانونی تقاضے پورے کریں تاکہ کارروائی سے بچا جا سکے۔

حکام کے مطابق فٹنس سرٹیفکیٹ کے بغیر چلنے والی گاڑیاں نہ صرف ٹریفک قوانین کی خلاف ورزی کا باعث بنتی ہیں بلکہ خستہ حال یا غیر محفوظ گاڑیوں کے باعث سڑکوں پر حادثات کے امکانات بھی بڑھ جاتے ہیں۔ فٹنس چیک کرنے کے اقدام کا مقصد سڑکوں پر چلنے والی گاڑیوں کی حالت بہتر بنانا، حادثات کے خطرات کم کرنا اور شہریوں کو محفوظ سفری سہولیات فراہم کرنا ہے۔

ضلعی انتظامیہ اور متعلقہ محکموں کے مطابق 15 اکتوبر کے بعد فٹنس سرٹیفکیٹ کے بغیر کسی گاڑی کو سڑکوں پر چلنے کی اجازت نہیں دی جائے گی۔ خلاف ورزی کرنے والے گاڑی مالکان اور ٹرانسپورٹرز کے خلاف قانون کے مطابق کارروائی عمل میں لائی جائے گی۔

حکام نے گاڑی مالکان سے اپیل کی ہے کہ وہ آخری تاریخ کا انتظار کیے بغیر اپنی گاڑیوں کی فٹنس مکمل کروا لیں اور ضروری دستاویزات و قانونی تقاضے پورے کریں تاکہ کریک ڈاؤن کے دوران کسی قسم کی دشواری کا سامنا نہ کرنا پڑے۔