جہلم میں ٹریفک نظام بہتر بنانے کے لیے اہم اجلاس، غیر قانونی رکشہ اڈوں اور تجاوزات کے خاتمے کی ہدایت
جہلم میں ٹریفک اینڈ پارکنگ مینجمنٹ کے نظام کو مؤثر بنانے، غیر قانونی رکشہ اڈوں کے خاتمے اور تجاوزات کی روک تھام کے لیے ایڈیشنل ڈپٹی کمشنر انفورسمنٹ سارہ امجد کی زیر صدارت ایک اہم اجلاس منعقد ہوا، جس میں شہر میں ٹریفک کی روانی بہتر بنانے اور شہریوں کو آمدورفت میں درپیش مشکلات کے حل کے لیے مختلف امور کا تفصیلی جائزہ لیا گیا۔
اجلاس میں ڈی ایس پی ٹریفک، سیکرٹری ریجنل ٹرانسپورٹ اتھارٹی، چیف آفیسر ضلع کونسل، اسسٹنٹ ڈائریکٹر لوکل گورنمنٹ، چیف ایگزیکٹو آفیسر ایجوکیشن سمیت متعلقہ محکموں کے افسران نے شرکت کی۔
اجلاس کے دوران شہر کی اہم شاہراہوں، تجارتی مراکز اور مصروف مقامات پر ٹریفک کی صورت حال، بے ترتیب پارکنگ، رکشوں کے غیر قانونی اڈوں اور تجاوزات کے باعث پیدا ہونے والے مسائل کا تفصیلی جائزہ لیا گیا۔ اس موقع پر اس امر پر غور کیا گیا کہ گاڑیوں اور رکشوں کی غیر منظم پارکنگ کے باعث ٹریفک کی روانی میں پیدا ہونے والی رکاوٹوں کو کیسے دور کیا جائے اور شہریوں کے لیے سڑکوں پر آمدورفت کو مزید آسان بنایا جائے۔
اجلاس میں رکشوں کے لیے مخصوص اور منظم اسٹینڈز مقرر کرنے، پارکنگ کے انتظامات کو بہتر بنانے اور شہر کی اہم سڑکوں پر غیر ضروری رش اور رکاوٹوں کے خاتمے کے لیے مختلف تجاویز زیر غور آئیں۔ متعلقہ محکموں کے درمیان رابطہ کاری کو مؤثر بنانے اور ٹریفک قوانین و ضوابط پر عملدرآمد یقینی بنانے کے امور پر بھی تبادلہ خیال کیا گیا۔
ایڈیشنل ڈپٹی کمشنر انفورسمنٹ سارہ امجد نے متعلقہ افسران کو ہدایت کی کہ شہر میں ٹریفک اینڈ پارکنگ مینجمنٹ کے نظام کو مؤثر بنانے کے لیے مشترکہ حکمت عملی اختیار کی جائے۔ انہوں نے غیر قانونی رکشہ اڈوں کے خلاف کارروائی، تجاوزات کی روک تھام اور اہم شاہراہوں پر ٹریفک کی روانی برقرار رکھنے کے لیے عملی اقدامات کرنے پر زور دیا۔
انہوں نے متعلقہ اداروں کو ہدایت کی کہ باہمی رابطہ کاری اور مؤثر نگرانی کے ذریعے ٹریفک کے مسائل کا حل یقینی بنایا جائے، پارکنگ کے نظام کو بہتر بنایا جائے اور عوامی گزرگاہوں پر رکاوٹیں پیدا کرنے والے عوامل کی روک تھام کی جائے۔
اجلاس میں اس بات پر بھی زور دیا گیا کہ شہر کے مصروف تجارتی مراکز اور اہم شاہراہوں پر ٹریفک کی بلا تعطل روانی برقرار رکھنے کے لیے متعلقہ محکمے اپنی ذمہ داریاں مؤثر انداز میں ادا کریں تاکہ شہریوں کو روزمرہ آمدورفت میں سہولت فراہم کی جا سکے اور جہلم میں ٹریفک و پارکنگ کے نظام کو مزید منظم بنایا جا سکے۔
