جہلم: ڈپٹی کمشنر جہلم میر رضا اوزگن کی زیر صدارت مختلف ترقیاتی اور انتظامی امور کا ایک اہم اجلاس منعقد ہوا، جس میں متعلقہ محکموں کے افسران نے شرکت کی۔ اجلاس کا مقصد جاری ترقیاتی منصوبوں کی کارکردگی اور حکومتی اقدامات پر عملدرآمد کا تفصیلی جائزہ لینا تھا۔
اجلاس کے دوران پلس (PULSE) پراجیکٹ کی پیش رفت اور گرین پراپرٹی سرٹیفکیٹس کے اجرا کے حوالے سے بھی تفصیلی غور کیا گیا۔ ڈپٹی کمشنر نے متعلقہ افسران کو ہدایت کی کہ مقررہ اہداف کے حصول کے لیے اقدامات کو مزید تیز کیا جائے اور عوام کو بروقت اور بہتر سہولیات فراہم کی جائیں۔
مزید برآں اجلاس میں واسا جہلم، بیوٹیفکیشن اسکیم اور ستھرا پنجاب (SPAJ) پروگرام کے تحت جاری سرگرمیوں کا بھی تفصیلی جائزہ لیا گیا۔ ڈپٹی کمشنر نے واضح ہدایات جاری کیں کہ صفائی، نکاسی آب اور دیگر شہری سہولیات کے معیار کو بہتر بنانے کے لیے مربوط اور مؤثر حکمت عملی اپنائی جائے تاکہ شہریوں کو زیادہ سے زیادہ ریلیف فراہم کیا جا سکے۔
ڈپٹی کمشنر میر رضا اوزگن نے اس موقع پر کہا کہ تمام ترقیاتی منصوبوں کی بروقت اور معیاری تکمیل ہر صورت یقینی بنائی جائے گی۔ انہوں نے متعلقہ افسران کو ہدایت کی کہ فیلڈ میں اپنی نگرانی کو مزید مؤثر بنائیں اور باقاعدگی کے ساتھ پیش رفت رپورٹس جمع کروائیں تاکہ کام کی رفتار اور معیار کو برقرار رکھا جا سکے۔
-
-
-
-
