جہلم ٹول پلازہ سے مسہ کسوال تک جی ٹی روڈ شدید خستہ حالی کا شکار ہو گئی، جگہ جگہ گہرے گڑھوں کے باعث سڑک ٹرانسپورٹرز، شہریوں اور مسافروں کے لیے مشکلات کا باعث بن رہی ہے، جبکہ آئے روز حادثات کے باعث عوام میں شدید تشویش پائی جاتی ہے۔
مقامی رہائشیوں اور مسافروں کے مطابق جی ٹی روڈ کی خراب صورتحال کے باعث متعدد افراد حادثات میں زخمی ہوچکے ہیں، جبکہ موٹر سائیکل سواروں کو بالخصوص سفر کے دوران شدید مشکلات اور جان لیوا خطرات کا سامنا کرنا پڑتا ہے۔
شہریوں کا کہنا ہے کہ رات کے اوقات میں روشنی کے ناکافی انتظامات کے باعث سڑک پر موجود گڑھے مزید خطرناک ہو جاتے ہیں اور حادثات کا خدشہ بڑھ جاتا ہے۔
ٹرانسپورٹرز اور اہل علاقہ کے مطابق جی ٹی روڈ کی خستہ حالی کے حوالے سے متعلقہ اداروں کو متعدد مرتبہ زبانی اور تحریری طور پر آگاہ کیا جا چکا ہے، تاہم تاحال سڑک کی مرمت یا بحالی کے لیے مؤثر اقدامات نہیں کیے گئے۔
عوامی حلقوں نے اعلیٰ حکام سے مطالبہ کیا ہے کہ جہلم ٹول پلازہ تا مسہ کسوال جی ٹی روڈ کی ہنگامی بنیادوں پر مرمت و بحالی کرائی جائے تاکہ شہریوں، مسافروں اور ٹرانسپورٹرز کو درپیش مشکلات کا خاتمہ ہو اور مزید قیمتی جانوں کو حادثات سے محفوظ بنایا جا سکے۔
