پنڈدادنخان کے علاقے پنڈی سید پور میں نکاسی آب کا بحران، گلیاں جوہڑ بن گئیں، عوام پریشان

پنڈ دادنخان: جہلم کی تحصیل پنڈ دادنخان کی یونین کونسل پنڈی سید پور میں بلدیاتی اداروں کی مسلسل غفلت اور ناقص سیوریج نظام نے عوام کی زندگی اجیرن بنا دی ہے۔ بارشوں اور نکاسی آب کے ناقص انتظام کے باعث گلیاں، بازار اور رہائشی علاقے گندے پانی میں ڈوب چکے ہیں جبکہ مقامی انتظامیہ خاموش تماشائی بنی ہوئی ہے۔

مقامی ذرائع کے مطابق حالیہ بارشوں کے بعد گاؤں کا منظر ایک بڑے جوہڑ جیسا بن چکا ہے۔ نالیاں کچرے اور مٹی سے بند ہو چکی ہیں جس کے باعث پانی کی نکاسی مکمل طور پر رک چکی ہے۔ متعدد گلیاں مسلسل پانی میں ڈوبی ہوئی ہیں، جہاں سے بزرگوں، خواتین، بچوں اور خصوصاً اسکول جانے والے طلبہ اور نمازیوں کا گزرنا مشکل ہو چکا ہے۔

بازاروں، دکانوں اور دیگر عوامی مقامات تک رسائی بھی شدید متاثر ہے۔ کئی مقامات پر سیوریج کا گندا پانی ہفتوں سے کھڑا ہے، جس سے شدید تعفن اور مچھروں کی افزائش نے علاقہ مکینوں کو بیماریوں کے خطرات سے دوچار کر دیا ہے۔ عوامی شکایات کے باوجود تاحال کوئی عملی قدم نہیں اٹھایا گیا۔

مقامی معززین اور سماجی کارکنان نے وزیراعلیٰ پنجاب مریم نواز شریف سے مطالبہ کیا ہے کہ "ستھرا پنجاب پروگرام” کو صرف دعووں تک محدود نہ رکھا جائے بلکہ پنڈی سید پور جیسے دیہی علاقوں میں ہنگامی بنیادوں پر صفائی، نکاسی آب اور سیوریج نظام کی بہتری کے لیے فوری اقدامات کیے جائیں۔

عوامی حلقوں کا کہنا ہے کہ اگر بروقت اقدامات نہ کیے گئے تو یہ علاقہ صحت و صفائی کے بڑے بحران کا شکار ہو جائے گا۔ شہریوں نے مطالبہ کیا ہے کہ ضلعی اور تحصیل انتظامیہ فوری نوٹس لے کر عوام کی مشکلات کا ازالہ کرے۔