جہلم: جشن آزادی کی آمد کے ساتھ ہی جہلم شہر میں وطن سے محبت کے رنگ نمایاں ہونے لگے ہیں۔ شہر کے مختلف مقامات پر جشنِ آزادی کے خصوصی اسٹالز سج گئے ہیں، جبکہ سرکاری عمارتوں کو برقی قمقموں، قومی پرچموں اور سبز و سفید جھنڈیوں سے سجانے کا سلسلہ بھی شروع کر دیا گیا ہے۔
جشنِ آزادی کے حوالے سے قائم کیے گئے اسٹالز پر قومی پرچم، بیجز، اسٹیکرز، بچوں کے خصوصی ملبوسات، جھنڈیاں اور دیگر آرائشی سامان شہریوں کی خصوصی توجہ کا مرکز بنے ہوئے ہیں۔ اگست کا آغاز ہوتے ہی ان اسٹالز پر خریداری کے لیے شہریوں کا رش بھی بڑھنے لگا ہے، جبکہ بچے سبز و سفید رنگ کے ملبوسات، جھنڈیوں اور بیجز کی خریداری میں خصوصی دلچسپی لے رہے ہیں۔
اسٹالز پر آنے والے بچوں کے چہروں پر خوشی اور ہاتھوں میں لہراتے سبز ہلالی پرچم وطن سے محبت کی خوبصورت تصویر پیش کر رہے ہیں۔ والدین بھی اپنے بچوں کے ہمراہ اسٹالز کا رخ کر رہے ہیں اور یومِ آزادی کی خوشیوں کو یادگار بنانے کے لیے قومی پرچم اور دیگر اشیائے ضروریہ خرید رہے ہیں۔
دوسری جانب سرکاری عمارتوں کو برقی قمقموں، قومی پرچموں اور سبز و سفید جھنڈیوں سے سجانے کا عمل بھی جاری ہے، جس کے باعث شہر میں جشنِ آزادی کا رنگ مزید گہرا ہوتا جا رہا ہے۔
شہریوں کا کہنا ہے کہ آزادی محض ایک دن منانے کا نام نہیں بلکہ یہ ان عظیم قربانیوں کو یاد کرنے کا موقع ہے جن کے نتیجے میں ہمیں پاکستان جیسی نعمت حاصل ہوئی۔ ان کا کہنا تھا کہ جشنِ آزادی کی یہ خوبصورت سرگرمیاں نئی نسل میں وطن کی قدر، قومی یکجہتی اور پاکستان سے محبت کے جذبات اجاگر کرنے میں اہم کردار ادا کرتی ہیں۔
شہریوں نے اس عزم کا اظہار کیا کہ 14 اگست کو جشنِ آزادی بھرپور جوش و جذبے، ملی یکجہتی اور وطن سے محبت کے ساتھ منایا جائے گا۔
