ڈکیتی کیس کا فیصلہ، عدالت نے چار مجرمان کو 10،10 سال قید اور بھاری جرمانے کی سزا سنا دی

دینہ: ڈکیتی کیس کا فیصلہ، عدالت نے چار مجرمان کو 10،10 سال قید اور بھاری جرمانے کی سزا سنا دی۔

تفصیلات کے مطابق ڈکیتی کے مقدمے میں جہلم کی عدالت نے چار مجرمان کو جرم ثابت ہونے پر 10،10 سال قید اور 70،70 ہزار روپے جرمانے کی سزا سنا دی۔ مقدمہ تھانہ دینہ میں سال 2023 کے دوران درج کیا گیا تھا۔

ترجمان جہلم پولیس کے مطابق تھانہ دینہ میں درج مقدمہ نمبر 746/23، بجرم 395/412 تعزیرات پاکستان کا فیصلہ سناتے ہوئے معزز عدالت نے ارشد محمود، راشد محمود، محمد فرہاد اور اسد محمود کو ڈکیتی کے جرم میں دس، دس سال قید اور ستر، ستر ہزار روپے جرمانے کی سزا سنائی۔

ترجمان کے مطابق مذکورہ ملزمان نے سال 2023 میں ڈکیتی کی واردات کا ارتکاب کیا تھا۔ واقعے کے بعد جہلم پولیس نے جدید تفتیشی اور تکنیکی ذرائع بروئے کار لاتے ہوئے ملزمان کو گرفتار کیا اور تفتیش مکمل کرنے کے بعد ٹھوس شواہد کی بنیاد پر چالان عدالت میں پیش کیا۔

ترجمان کے مطابق مقدمے کی موثر تفتیش، شواہد کی بروقت فراہمی اور عدالت میں مضبوط پیروی کے نتیجے میں معزز عدالت نے چاروں ملزمان کو سزا سنانے کا فیصلہ دیا۔

ڈسٹرکٹ پولیس آفیسر (ڈی پی او) شفیق احمد چوہدری نے کہا کہ جرائم پیشہ عناصر کے خلاف بلاامتیاز کارروائیاں جاری رہیں گی اور شہریوں کے جان و مال کا تحفظ جہلم پولیس کی اولین ترجیح ہے۔ انہوں نے کہا کہ سنگین جرائم میں ملوث ملزمان کو قانون کے کٹہرے میں لا کر قرار واقعی سزا دلوانے کے لیے تمام دستیاب وسائل بروئے کار لائے جا رہے ہیں۔